କର୍ଣ୍ଣାଟକ: ମହାମାରୀ କୋରୋନା ଏବେ ନିଜ ଲୋକଙ୍କୁ ମଧ୍ୟ ପର କରିଦେଇଛି । କୋରୋନା ଭୟରେ ଲୋକେ ନିଜ ବାପା-ମାଙ୍କୁ ମଧ୍ୟ ସାହାଯ୍ୟ କରିବାକୁ ସଙ୍କୋଚ ପ୍ରକାଶ କରୁଛନ୍ତି । ଏପରି ସମୟରେ କୋରୋନା ରୋଗୀଙ୍କ ସାହାଯ୍ୟ ପାଇଁ ମାଙ୍ଗାଲୋରରୁ ବେଙ୍ଗାଲୁରୁ ଯାତ୍ରା କରି ଉଦାହରଣ ପାଲଟିଛନ୍ତି 2 ଜଣ ଯୁବକ । କୋରୋନା ରୋଗୀଙ୍କୁ ପ୍ଲାଜମା ଯୋଗାଇବା ପାଇଁ ଉଭୟ ଯୁବକ ମାଙ୍ଗାଲୋରରୁ ବେଙ୍ଗାଲୁରୁ ଯାତ୍ରା କରିଥିବା ଜଣାପଡିଛି ।
କୋରୋନା ଯୋଗୁଁ କର୍ଣ୍ଣାଟକରେ ଅନେକ ଲୋକଙ୍କର ମୃତ୍ୟୁ ଘଟିଛି । ପ୍ରତିଦିନ କୋରୋନା ସଂକ୍ରମଣ ମାମଲା ବଢିବାରେ ଲାଗିଛି। କୋରୋନାକୁ ନିୟନ୍ତ୍ରଣ କରିବା ପାଇଁ ରାଜ୍ୟ ସରକାର ଏବଂ ସ୍ବାସ୍ଥ୍ୟ ବିଭାଗ ଚେଷ୍ଟା କରୁଛନ୍ତି । କେତେକ ରୋଗୀଙ୍କୁ ପ୍ଲାଜମା ଥେରାପି ଦ୍ବାରା ଚିକିତ୍ସା କରାଯାଉଛି । ତେବେ ବେଙ୍ଗାଲୁରୁ ଭତକାଲର ଜଣେ 85 ବର୍ଷିୟା ବୃଦ୍ଧାଙ୍କୁ ପ୍ଲାଜମାର ଆବଶ୍ୟକ ଥିଲା । ବୃଦ୍ଧା ଜଣକ କୋରୋନାରେ ସଂକ୍ରମିତ ହେବାପରେ ତାଙ୍କୁ ଏକ ଘରୋଇ ହସ୍ପିଟାଲରେ ଚିକିତ୍ସା କରାଯାଉଥିଲା । ତେବେ ତାଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ହେବାରୁ ଡାକ୍ତର ତାଙ୍କୁ ପ୍ଲାଜମା ଥେରାପି ପାଇଁ ପରାମର୍ଶ ଦେଇଥିଲେ । ହେଲେ ସେଠାରେ କୌଣସି ପ୍ଲାଜମା ସଂଗ୍ରହ କେନ୍ଦ୍ର ନଥିବାରୁ ହାଇଦର ଅଲି ଏବଂ ଜିଶାନ୍ ଅଲି ବୃଦ୍ଧାଙ୍କୁ ପ୍ଲାଜମା ଡୋନେଟ କରିବା ପାଇଁ ବେଙ୍ଗାଲୁରୁ ଆସିଥିଲେ ।