ନୂଆଦିଲ୍ଲୀ: ଆରମ୍ଭ ହେବ ଦୁନିଆର ସବୁଠୁ ଉଚ୍ଚତମ ପର୍ବତ ମାଉଣ୍ଟ ଏଭରେଷ୍ଟରୁ ଅଳିଆ ସଫା । ଏହି ଅଭିଯାନ ପାଇଁ ନେପାଳ ସରକାର ପର୍ବାତାରୋହୀ ସଙ୍ଗଠନ, ସେନା ଓ ସ୍ଥାନୀୟ ସଙ୍ଗଠନ ସହ ହାତ ମିଳାଇଛନ୍ତି । ସେନେଇ ଏପ୍ରିଲ 25ରୁ 14 ଟି ଟିମ୍ ଏଭରେଷ୍ଟର ବେସ କ୍ୟାମ୍ପକୁ ଯିବେ । ପର୍ବତ ଶିଖରରେ ଜମା ହୋଇଥିବା 10 ହଜାର କିଲୋଗ୍ରାମର ଆବର୍ଜନାକୁ ତଳକୁ ଆଣିବା ଏହି ଅଭିଯାନର ଉଦ୍ଦେଶ୍ୟ । ବେସ କ୍ୟାମ୍ପ ପର୍ଯ୍ୟନ୍ତ ଆବର୍ଜନା ଆଣିଥିବା ବ୍ୟକ୍ତିଙ୍କୁ ନେପାଳ ସରକାର ପ୍ରୋତ୍ସାହନ ରାଶି ଦେବାର ସୂଚନା ମିଳିଛି ।
ତେବେ ପର୍ବତାରୋହୀଙ୍କ ଏଭରେଷ୍ଟ ଆରୋହଣ ଯୋଗୁଁ ଦୀର୍ଘଦିନ ଧରି ଶିଖରେରେ ଅଳିଆ ଆବର୍ଜନା ଜମା ହୋଇ ରହିଛି। ଯେଉଁଥିପାଇଁ ବାରମ୍ବାର ଏଭରେଷ୍ଟର ସ୍ବଚ୍ଛତାକୁ ନେଇ ନେପାଳ ଉପରକୁ ସବୁବେଳେ ଆଙ୍ଗୁଠି ଉଠୁଥିବା କହିଛନ୍ତି ନେପାଳ ପର୍ଯ୍ୟଟନ ବିଭାଗର ମୁଖ୍ୟ । କିନ୍ତୁ ଏବେ ଏହାର ସମାଧାନ ପାଇଁ ଏକ ଟିମ ଗଠନ କରାଯାଇଛି।