ପାଟନା:ବିହାର ଗସ୍ତରେ ଥିବା କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ନିତ୍ଯାନନ୍ଦ ରାୟଙ୍କ କାରକେଡ ଉପରେ ମୁଜାଫରପୁରରେ ଆକ୍ରମଣ ହୋଇଛି । ଗତକାଲି (ଶନିବାର) ସଂଧ୍ୟାରେ ମୋତିହାରିରେ ଏକ କାର୍ଯ୍ୟକ୍ରମରେ ଯୋଗଦେଇ ରାଜଧାନୀ ପାଟନା ଫେରୁଥିବା ବେଳେ ଦେବରିଆ ଥାନା ଅଧୀନ ବିଶୁନପୁରେ ଚୌକ ନିକଟରେ କେନ୍ଦ୍ରମନ୍ତ୍ରୀ ରାୟଙ୍କ କାରକେଡ ଉପରେ ଆକ୍ରମଣ କରିଛି ଜଣେ ଯୁବକ । ହାତରେ ଏକ ବାଡି ଧରି ଯୁବକଜଣଙ୍କ କାରକେଡ ରୋକିବା ସହ ମନ୍ତ୍ରୀଙ୍କ ଗାଡିକୁ ଆକ୍ରମଣ କରିବା ପାଇଁ ଉଦ୍ଯମ କରିଥିଲା । ସୁରକ୍ଷା ଦାୟିତ୍ବରେ ଥିବା ପୋଲିସ କର୍ମୀ ଉକ୍ତ ଯୁବକକୁ ତୁରନ୍ତ କାବୁ କରିନେଇଥିଲେ ।
କାରକେଡ ଉପରେ ଆକ୍ରମଣ କରିଥିବା ଯୁବକଙ୍କୁ ପୋଲିସ ଗିରଫ କରି ସ୍ଥାନୀୟ ଥାନାକୁ ନେଇଛି । ଅନ୍ୟପଟେ ଅଭିଯୁକ୍ତର ଆକ୍ରମଣରେ କାରକେଡରେ ସାମିଲ ଅନ୍ୟ ଦୁଇ କାର ସାମାନ୍ୟ କ୍ଷତିଗ୍ରସ୍ତ ହୋଇଥିବା ନେଇ କିଛି ଗଣମାଧ୍ୟମରେ ଖବର ପ୍ରସାରିତ ହୋଇଥିଲେ ସୁଦ୍ଧା ଅଭିଯୋଗକୁ ବିହାର ପୋଲିସ ସମ୍ପୂର୍ଣ୍ଣ ଖଣ୍ଡନ କରିଛି । କାରକେଡରେ ସାମିଲ କୌଣସି ଗାଡି କ୍ଷତିଗ୍ରସ୍ତ ହୋଇନାହିଁ କିମ୍ବା କାରକେଡ ଆଦୌ ବିଳମ୍ବ ମଧ୍ୟ ହୋଇନାହିଁ ବୋଲି ପୋଲିସ କହିବା ସହ ଏପରି ଖବର ମିଥ୍ୟା ବୋଲି ଦର୍ଶାଇଛି । ପୋଲିସ ଅଭିଯୁକ୍ତ ଯୁବକକୁ କାବୁ କରିବା ପରେ ସ୍ଥାନୀୟ ଥାନାକୁ ନେଇ ଜେରା କରୁଛି । ଅଭିଯୁକ୍ତର ଅନ୍ୟ କୌଣସି ରାଜନୈତିକ ଦଳର ଲିଙ୍କ୍ ରହିଛି କି ନାହିଁ, ସେ ନେଇ କୌଣସି ସୂଚନା ପୋଲିସ ସୂତ୍ରରୁ ସ୍ପଷ୍ଟ କରାଯାଇନି ।