ଶ୍ରୀନଗର:କାଶ୍ମୀରର ସ୍ଥିତି ସ୍ଥିର ହେବା ସହ ନିର୍ବାଚନ ମଣ୍ଡଳୀ ସୀମା ନିର୍ଦ୍ଧାରଣ ପରେ ପରେ ପୁଣି ମିଳିପାରେ ରାଜ୍ୟ ପାହ୍ୟା । ଶନିବାର ୩ ଦିନିଆ ଜମ୍ମୁ କାଶ୍ମୀର ଗସ୍ତରେ ଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଜନସଭାକୁ ସମ୍ବୋଧିତ କଲା ବେଳେ ଏପରି ମତ ରଖିଛନ୍ତି । ଶନିବାର ଜମ୍ମୁ କାଶ୍ମୀରର ଯୁବ କ୍ଲବ ସଦସ୍ୟଙ୍କୁ ସମ୍ବୋଧିତ କରିବା ଅବସରରେ କାଶ୍ମୀରକୁ ନେଇ କେନ୍ଦ୍ର ପ୍ରସ୍ତୁତ କରିଥିବା ବିକାଶର ରୋଡମ୍ୟାପ ସମ୍ପର୍କରେ ବିଶେଷ ସୂଚନା ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ ।
ଶାହା କାଶ୍ମୀରର ଯୁବ ଗୋଷ୍ଠୀଙ୍କୁ ପ୍ରଶ୍ନ କରି କହିଛନ୍ତି, ସୀମା ନିର୍ଦ୍ଧାରଣକୁ କାହିଁକି କିଛି ନିର୍ଦ୍ଦିଷ୍ଟ ଗୋଷ୍ଠୀ ବିରୋଧ କରୁଛନ୍ତି । କାରଣ ସୀମା ନିର୍ଦ୍ଧାରଣ ହେବା ଫଳରେ ସେମାନଙ୍କ ରାଜନୈତିକ ସ୍ବାର୍ଥରେ ବାଧା ସୃଷ୍ଟି ହେବ । କିନ୍ତୁ ବର୍ତ୍ତମାନ ସ୍ଥିତିରେ ସୀମା ନିର୍ଦ୍ଧାରଣ ଏକ ଆବଶ୍ୟକତା ଓ ଏହା ନିଶ୍ଚୟ କାର୍ଯ୍ୟକାରୀ ହେବା ଉଚିତ । ଏବଂ ନିର୍ଦ୍ଧାରଣ ପ୍ରକ୍ରିୟା ଶେଷ ହେବା ପରେ କାଶ୍ମୀର ପ୍ରଗତିର ରାସ୍ତାରେ ଧାଇଁବା ଆରମ୍ଭ କରିବ । ଏଥିରେ ପ୍ରମୁଖ ଭୂମିକା ଗ୍ରହଣ କରିବେ ସ୍ଥାନୀୟ ଯୁବଗୋଷ୍ଠୀ । କାଶ୍ମୀର ପ୍ରଗତି ପାଇଁ କେନ୍ଦ୍ର ସରକାର ସମ୍ପୂର୍ଣ୍ଣ ରୋଡ ମ୍ୟାପ ପ୍ରସ୍ତୁତ କରିଛନ୍ତି ଓ ସେ ସେଠାକୁ କାଶ୍ମୀର ଯୁବକଙ୍କ ବନ୍ଧୁ ହେବା ପାଇଁ ଆସିଥିବା କହିଥିଲେ ଶାହ ।
ସେହିପରି ଶାହ କହିଛନ୍ତି, ଜାମ୍ମୁ କାଶ୍ମୀରରେ ବିକାଶରେ କେହି ବାଧା ଦେଇ ପାରିବେ ନାହିଁ । କାଶ୍ମୀରରେ ଶାନ୍ତି ଭଙ୍ଗ କରି ଅରାଜକତା ଓ ଆତଙ୍କ ଖେଳାଇବାକୁ ଚାହୁଁଥିବା ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଭୟ, ଆତଙ୍କବାଦ, ଦୁର୍ନୀତି ଏବଂ ପରିବାର ଭିତ୍ତିକ ରାଜନୀତି ଠାରୁ ବିକାଶ ତଥା ସମୃଦ୍ଧତା ପର୍ଯ୍ୟନ୍ତ କାଶ୍ମୀର ଏକ ନୂତନ ଆରମ୍ଭର ସମ୍ଭାବନା ଦେଖିଛି। ଜାମ୍ମୁ କାଶ୍ମୀରର ଯୁବକମାନେ ଏହି ପରିବର୍ତ୍ତନକୁ ସମ୍ଭବ କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି ।
ବର୍ତ୍ତମାନ ସମୟର ଉଦାହରଣ ଦେଇ ଶାହ କହିଛନ୍ତି, କାଶ୍ମୀରରେ ବର୍ତ୍ତମାନ ଆତଙ୍କବାଦ ହ୍ରାସ ପାଇଛି, ପଥର ଫିଙ୍ଗିବା ସମସ୍ୟା ଅଦୃଶ୍ୟ ହୋଇପଡିଛି । ଜାମ୍ମୁ କାଶ୍ମୀରର ଶାନ୍ତି ଏବଂ ସୌହାର୍ଦ୍ଦ୍ୟକୁ ନଷ୍ଟ କରିବାକୁ ପ୍ରୟାସ କରୁଥିବା ବ୍ୟକ୍ତି ବା ଗୋଷ୍ଠୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଭାରତ ସରକାର ନିଶ୍ଚିତ । କାଶ୍ମୀରର ବିକାଶ କେନ୍ଦ୍ର ସରକାରଙ୍କ ପ୍ରତିବଦ୍ଧତା । ତାକୁ ବ୍ୟାହତ କରିବାକୁ ଉଦ୍ୟମ କରୁଥିବା କୌଣସି ଶକ୍ତିକୁ ବରଦାସ୍ତ କରାଯିବନାହିଁ । 2019ରୁ ଜମ୍ମୁ କାଶ୍ମୀରରେ ସ୍ବଚ୍ଛତା ଏବଂ ଦୁର୍ନୀତିମୁକ୍ତ ଶାସନ ଏହି ଅଞ୍ଚଳର ବିକାଶର ସ୍ତମ୍ଭ ବୋଲି ସାକ୍ଷୀ ରହିଥିବା କହିଛନ୍ତି ଶାହ ।
ଶାହ ଆହୁରି ମଧ୍ୟ ଧାରା 370 ରଦ୍ଦ ନକରିଥିଲେ ଏହି ସ୍ଥିରତା କେବେ ହେଲେ ପ୍ରତିଷ୍ଠା ହେବା ସମ୍ଭବ ହୋଇପାରି ନଥାନ୍ତା । ଘାଟିରେ କେନ୍ଦ୍ର ସରକାର,ଶିକ୍ଷା ତଥା ଦକ୍ଷତା ବିକାଶ, କ୍ରୀଡା ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଏକାଧିକ କାର୍ଯ୍ୟକ୍ରମ ହାତକୁ ନେଇଛନ୍ତି । ଅଗଷ୍ଟ 2019ରେ ଜାମ୍ମୁ କାଶ୍ମୀରରେ କେନ୍ଦ୍ର ସରକାର ଧାରା 370 ରଦ୍ଦ କରିଦେଇଥିଲେ । ଏହା ଜାମ୍ମୁ କାଶ୍ମୀରକୁ ମଧ୍ୟ ୨ଟି କେନ୍ଦ୍ର ଶାସିତ ଅଞ୍ଚଳରେ ବିଭକ୍ତ କରିଥିଲା।