Ambedkar Jayanti: ଗାନ୍ଧୀନଗରରେ ଧର୍ମ ପରିବର୍ତ୍ତନ କଲେ 50 ହଜାରରୁ ଊର୍ଦ୍ଧ୍ବ ଲୋକ

ସମ୍ବିଧାନର ପ୍ରଣେତା ଆମ୍ବେଦକରଙ୍କ ଜୟନ୍ତୀରରେ ଗୁଜୁରାଟ ଗାନ୍ଧୀନଗରରେ ୫୦ ହଜାରରୁ ଊର୍ଦ୍ଧ୍ବ ଲୋକ ଆପଣାଇଲେ ବୌଦ୍ଧ ଧର୍ମ । ଅଧିକ ପଢନ୍ତୁ

ଗାନ୍ଧୀନଗର:ସମ୍ବିଧାନର ପ୍ରଣେତା ବି.ଆର ଆମ୍ବେଦକରଙ୍କ ୧୩୨ତମ ଜୟନ୍ତୀରେ ବୌଦ୍ଧ ଧର୍ମ ଗ୍ରହଣ କଲେ ହଜାର ହଜାର ଲୋକ । ଧର୍ମ ପରିବର୍ତ୍ତନ ଲାଗି ଗୁଜୁରାଟ ଗାନ୍ଧୀନଗର ରାମକଥା ମୈଦାନରେ ଭିଡ଼ ଜମିଥିଲା । ଧର୍ମ ପରିବର୍ତ୍ତନ ଲାଗି ଏଠାରେ କିଛି ବୌଦ୍ଧ ଧାର୍ମିକ ଗୁରୁ ମଧ୍ୟ ଉପସ୍ଥିତ ରହିଥିଲେ । ସ୍ବୟଂ ସୈନିକ ଦଳର ନେତୃତ୍ବରେ ବୌଦ୍ଧ ଧର୍ମ ଗ୍ରହଣ କରିବା ଲାଗି ଗୁଜୁରାଟର ଅନେକ ଜିଲ୍ଲାରୁ ଲୋକେ ଗାନ୍ଧୀନଗରରେ ପହଞ୍ଚିଥିଲେ । ଆସନ୍ତା ୨୦୨୮ ମସିହା ପର୍ଯ୍ୟନ୍ତ ୧ କୋଟି ଲୋକ ବୌଦ୍ଧ ଧର୍ମ ଗ୍ରହଣ କରିବେ ବୋଲି କହିଛନ୍ତି ଦଳର ନେତା ଦେବେନ୍ଦ୍ର ମକୱାନ ।

ଧର୍ମ ପରିବର୍ତ୍ତନ ଲାଗି ରାମକଥା ମୈଦାନରେ ହଜାର ହଜାର ଲୋକଙ୍କ ଭିଡ଼ ଜମିଥିଲା । ଏନେଇ ସ୍ବୟଂ ସୈନିକ ଦଳର ଜଣେ ନେତା ବିନୟ ପରମାର କହିଛନ୍ତି, "ଆଜି ବି ରାଜ୍ୟ ଓ ପୁରା ଦେଶରେ ଧର୍ମକୁ ନେଇ ଭେଦଭାବ ଦେଖିବାକୁ ମିଳୁଛି । ଅନୁସୂଚିତ ଜାତି ଓ ଜନଜାତିଙ୍କ ସହିତ ଅନ୍ୟାୟ ହେଉଛି । ଜଣେ ମହିଳାଙ୍କୁ ଦୁଷ୍କର୍ମ କରି ହତ୍ୟା କରାଯାଉଥିବା ବେଳେ ସରକାର କେବଳ ୪ଲକ୍ଷ ଟଙ୍କା ସହାୟତା ଦେଉଛନ୍ତି । ଯେତେବେଳେ ଅନେକ ଲୋକଙ୍କ ଉପରେ ଅତ୍ୟାଚାର ହେଉଛି ଓ ସେମାନେ କିଛି କହିପାରୁନାହାନ୍ତି ତେବେ ଉକ୍ତ ଧର୍ମକୁ ତ୍ୟାଗ କରି ବୌଦ୍ଧ ଧର୍ମକୁ ଗ୍ରହଣ କରିବା ଉଚିତ ।"

ସେ ଆହୁରି କହିଛନ୍ତି ଯେ ଆଜି ଏଠାରେ ଉପସ୍ଥିତ ରହିଥିବା ଲୋକମାନେ ବୌଦ୍ଧ ଧର୍ମ ଗ୍ରହଣ କରିବା ଲାଗି ଜିଲ୍ଲାପାଳଙ୍କ କାର୍ଯ୍ୟାଳୟରେ ଆବେଦନ କରିଥିଲେ । ତନ୍ମଧ୍ୟରୁ କିଛି ଲୋକଙ୍କୁ ଅନୁମତି ଦିଆଯାଇଥିବା ବେଳେ ଅନ୍ୟ ଲୋକଙ୍କୁ ଏଯାଏଁ ଅନୁମତି ଦିଆଯାଇନାହିଁ । ଆଗକୁ ଉକ୍ତ ବ୍ୟକ୍ତିଙ୍କୁ ଅନୁମତି ମିଳିବା ପରେ ଏହି ଧର୍ମ ପରିବର୍ତ୍ତନ କାର୍ଯ୍ୟକ୍ରମ ଜାରି ରହିବ । ସେପଟେ ସ୍ବୟଂ ସୈନିକ ଦଳର କାର୍ଯ୍ୟକର୍ତ୍ତା ଦେବେନ୍ଦ୍ର ମକୱାନ ଗାନ୍ଧୀନଗର ରାମକଥା ମୈଦାନରେ ବୌଦ୍ଧ ଧର୍ମ ଗ୍ରହଣ କରିବା ପରେ କହିଛନ୍ତି, "ଏହି କାର୍ଯ୍ୟକ୍ରମ ୨୦୨୦-୨୧ରେ ଗୁଜୁରାଟରେ ହେବାର ଥିଲା । ମାତ୍ର କୋରୋନା ମହାମାରୀ ପାଇଁ ଏହାକୁ ରଦ୍ଦ କରାଯାଇଥିଲା । ଆଜି ଏହି କାର୍ଯ୍ୟକ୍ରମର ଆୟୋଜନ କରାଯାଉଛି ।"

ଯେତେବେଳେ ୨୦୨୮ ମସିହାରେ ଏହିପରି କାର୍ଯ୍ୟକ୍ରମ ଅନୁଷ୍ଠିତ ହେବେ ସେତେବେଳେ ପ୍ରାୟ ୧ କୋଟି ଲୋକ ବୌଦ୍ଧ ଧର୍ମକୁ ସ୍ବୀକାର କରିବେ । ସ୍ବୟଂ ସୈନିକ ଧର୍ମର ଆୟୋଜନ କରାଯାଇ ଅନୁସୂଚିତ ଜାତି ଓ ଜନଜାତି ସମ୍ପ୍ରଦାୟର ଲୋକଙ୍କୁ ଏକତ୍ର କରାଯିବ । ଏଥିଲାଗି ମାଷ୍ଟର ପ୍ଲାନ ମଧ୍ୟ ପ୍ରସ୍ତୁତ ରହିଛି ବୋଲି କହିଛନ୍ତି ଦେବେନ୍ଦ୍ର ।