ହାଇଦ୍ରାବାଦ:ରାହୁଲ ଗାନ୍ଧୀଙ୍କ ତେଲେଙ୍ଗାନା ଗସ୍ତ ପୂର୍ବରୁ ହାଇଦ୍ରାବାଦର କିଛି ସ୍ଥାନରେ ଦେଖିବାକୁ ମିଳିଛି ହ୍ବାଇଟ ଚ୍ୟାଲେଞ୍ଜ ଲେଖାଥିବା ବ୍ୟାନର । ଦୁଇ ଦିନିଆ ତେଲେଙ୍ଗାନା ଗସ୍ତରେ କଂଗ୍ରେସ ନେତା ରାହୁଲ ଗାନ୍ଧୀ ଆସୁଥିବା ବେଳେ ହାଇଦ୍ରାବାଦର ବ୍ୟସ୍ତବହୁଳ ଟ୍ୟାଙ୍କ ବଣ୍ଡ ଅଞ୍ଚଳରେ ଏହି ବ୍ୟାନର ଲଗାଯାଇଥିବା ଦେଖିବାକୁ ମିଳିଛି ।
ଏଥିରେ ରାହୁଲ ଗାନ୍ଧୀଙ୍କ ସଦ୍ୟତମ ନେପାଳ ନାଇଟ କ୍ଲବର ବିବାଦୀୟ ଫଟୋ ସ୍ଥାନ ପାଇଥିବା ସହ ରାହୁଲ ଜୀ, ଆପଣ ହ୍ବାଇଟ ଚ୍ୟାଲେଞ୍ଜ ପାଇଁ ପ୍ରସ୍ତୁତ ଅଛନ୍ତି କି ବୋଲି ପ୍ରଶ୍ନ ମଧ୍ୟ କରାଯାଇଥିବା ଦେଖିବାକୁ ମିଳିଛି । ତେବେ ତେଲେଙ୍ଗାନାରେ ଶାସକ ଦଳ ଟିଆରଏସ ପକ୍ଷରୁ ଏହି ବ୍ୟାନର ଲଗାଯାଇଥିବା ଚର୍ଚ୍ଚା ହେଉଛି ।
2021 ମସିହାରେ ଟଲିଉଡ ଡ୍ରଗ୍ସ ମାମଲାରେ ଏହି ହ୍ବାଇଟ ଚ୍ୟାଲେଞ୍ଜ ଶବ୍ଦ ସାମ୍ନାକୁ ଆସିଥିଲା । ସେତେବେଳେ କଂଗ୍ରେସ ଏହି ଚ୍ୟାଲେଞ୍ଜ ପାଇଁ ଟିଆରଏସ ନେତାଙ୍କୁ ଆହ୍ବାନ ଦେଇଥିଲା ଏବଂ ଟିଆରଏସ ନେତାମାନେ ମଧ୍ୟ କଂଗ୍ରେସ ନେତାଙ୍କୁ ଟାର୍ଗେଟ କରିଥିଲେ । ତେଲେଙ୍ଗାନା ପ୍ରଦେଶ କଂଗ୍ରେସ ଅଧ୍ୟକ୍ଷ ଅଭିଯୋଗ କରିଥିଲେ ଯେ ଟିଆରଏସ ନେତାମାନେ ଡ୍ରଗ୍ସ ମାମଲାରେ ଜଡିତ । ତେଣୁ ସେମାନେ ନିଜର ସ୍ବଚ୍ଛାତା ପ୍ରମାଣିତ କରିବା ପାଇଁ ହ୍ବାଇଟ ଚ୍ୟାଲେଞ୍ଜକୁ ଗ୍ରହଣ କରନ୍ତୁ ।
ତେବେ ଏହାରି ମଧ୍ୟରେ ରାହୁଲଙ୍କ ଗସ୍ତ ପୂର୍ବରୁ ଏହି ବିବାଦୀୟ ଶବ୍ଦ ପୁଣି ଚର୍ଚ୍ଚାକୁ ଆସିଛି । ଏପରି ବ୍ୟାନର ଦୃଷ୍ଟିଗୋଚର ହେବା ପରେ ଗଣମାଧ୍ୟମରେ ମଧ୍ୟ ଚର୍ଚ୍ଚା ହେବା ଆରମ୍ଭ ହୋଇଛି । ରାହୁଲ ନିଜ ନେପାଳ ଗସ୍ତରେ ଏକ ନାଇଟ କ୍ଲବରେ ନଜର ଆସିବା ପରେ ତାଙ୍କୁ ନେଇ ବିବାଦ ଓ ବତର୍କ ମଧ୍ୟ ଆରମ୍ଭ ହୋଇସାରିଛି ।
ବ୍ୟୁରୋ ରିପୋର୍ଟ, ଇଟିିଭି ଭାରତ
