ନୂଆଦିଲ୍ଲୀ: ନ୍ୟାସନାଲ ହେରାଲ୍ଡ ଖବରକାଗଜ ଘୋଟାଲା ମାମଲାରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ଆସନ୍ତାକାଲି (ଗୁରୁବାର) କ୍ରମାଗତ 4ର୍ଥ ଦିନରେ ହାଜର ହେବା ପାଇଁ ଡାକିଛି ତଦନ୍ତକାରୀ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ । ରାହୁଲଙ୍କ ମାରାଥନ ଜେରାକୁ ନେଇ ରାଜନୀତି ମଧ୍ୟ ତେଜିବାରେ ଲାଗିଛି । କଂଗ୍ରେସ କାର୍ଯ୍ୟକର୍ତ୍ତା ଦିଲ୍ଲୀର ED ମୁଖ୍ୟାଳୟ ସମେତ ଏକାଧିକ ସ୍ଥାନରେ ମଧ୍ୟ ପ୍ରତିବାଦ ଜାରି ରଖିଛନ୍ତି ।
ଏହାରି ମଧ୍ୟରେ ଘଟଣାକୁ ଅମାନୁଷିକ ଦର୍ଶାଇ ଲୋକସଭା ବାଚସ୍ପତି ଓମ ବିର୍ଲାଙ୍କ ନଜରକୁ ଆଣିଛନ୍ତି ଦଳର ବରିଷ୍ଠ ନେତା ଅଧିର ରଞ୍ଜନ ଚୌଧୁରୀ । ପ୍ରବର୍ତ୍ତନ ନିର୍ଦ୍ଦେଶାଳୟ ଜେରା ଆଳରେ ରାହୁଲଙ୍କ ପ୍ରତି ଅମାନୁଷିକ ବ୍ୟବହାର କରୁଥିବା ବାଚସ୍ପତିଙ୍କୁ ଲେ୍ଖିଥିବା ଚିଠିରେ ଉଲ୍ଲେଖ କରିଛନ୍ତି ଅଧିର । କିଛି ଭିତ୍ତିହୀନ ଅଭିଯୋଗ ଉପରେ ଇଡି ଉଦ୍ଦେଶ୍ୟମୂଳକ ଭାବେ ବାରମ୍ବାର ରାହୁଲଙ୍କୁ ହାଜର ହେବା ପାଇଁ ନିର୍ଦ୍ଦେଶ ଦେଉଥିବା ଅଧିର ଅଭିଯୋଗ କରିଛନ୍ତି ।