ନୂଆଦିଲ୍ଲୀ:ନରେନ୍ଦ୍ରମୋଦି ନେତୃତ୍ବାଧୀନ NDA ମେଣ୍ଟ ସରକାରର ବିକଳ୍ପ ହେବା ପାଇଁ ଅଣ୍ଟା ଭିଡିଥିବା ‘INDIA’ ମେଣ୍ଟରେ ଆରମ୍ଭରୁ ଦେଖାଗଲାଣି ଆସନ ବୁଝାମଣାର ବିବାଦ । ଏହି ପ୍ରସଙ୍ଗରେ ମୁହାଁମୁହିଁ ହୋଇଛନ୍ତି ମୁଖ୍ୟ ବିରୋଧୀ ଦଳ ତଥା ମେଣ୍ଟର ନେତୃତ୍ବ ନେଉଥିବା କଂଗ୍ରେସ ଓ ଦିଲ୍ଲୀର ଶାସନରେ ଥିବା କେଜ୍ରିଓ୍ବାଲଙ୍କ ଆମ ଆଦମୀ ପାର୍ଟି (AAP)।
ଆଜି (ବୁଧବାର) ଦିଲ୍ଲୀରେ ପ୍ରଦେଶ କଂଗ୍ରେସ ନେତାମାନେ ଦଳର ହାଇକମାଣ୍ଡ ମଲ୍ଲାକାର୍ଜୁନ ଖଡଗେଙ୍କୁ ଭେଟି ଆଲୋଚନା କରିଛନ୍ତି । କୁହାଯାଉଛି ଯେ, ଆସନ୍ତା ଲୋକସଭା ନିର୍ବାଚନ (2024)ରେ ଦିଲ୍ଲୀର ସମସ୍ତ 7ଟି ସଂସଦୀୟ ଆସନରେ କଂଗ୍ରେସ ଏକାକୀ ପ୍ରାର୍ଥୀ ଲଢାଇବାକୁ ଚାହୁଁଛି । ଏହାକୁ ନେଇ ଶାସନରେ ଥିବା ଆମ ଆଦମୀ ପାର୍ଟି କ୍ଷୁବ୍ଧ ହୋଇଛି । କଂଗ୍ରେସ ଆସନ ବୁଝମାଣ ନକରି ଏକାକୀ ସମସ୍ତ ଆସନରେ ଲଢିଲେ, AAP ‘ଇଣ୍ଡିଆ’ ମେଣ୍ଟରୁ ଓହରି ଯାଇପାରେ ବୋଲି ମଧ୍ୟ ଚର୍ଚ୍ଚା ହେଲାଣି । ଏପରିକି ମୁମ୍ବାଇରେ ହେବାକୁ ଥିବା ମେଣ୍ଟ ବୈଠକକୁ କେଜ୍ରିଓ୍ବାଲ ବର୍ଜନ କରିପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି ।
କଂଗ୍ରେସ ଏପରି ଆଭିମୁଖ୍ୟର ଆଭାସ ମିଳିବା ପରେ AAP କହିଛି, ଯଦି କଂଗ୍ରେସ ଦିଲ୍ଲୀରେ ଏକାଠି ନିର୍ବାଚନ ଲଢିବ ନାହିଁ, ତେବେ ଇଣ୍ଡିଆ ମେଣ୍ଟ ନିରର୍ଥକ । ଦଳୀୟ ମୁଖପାତ୍ର ପ୍ରିୟଙ୍କା କକ୍କର କହିଛନ୍ତି, ଆମ୍ ଆଦମୀ ପାର୍ଟି ଏବଂ କଂଗ୍ରେସ ମଧ୍ୟରେ ମିଳିତ ମଞ୍ଚ ଆସନ ବୁଝମଣା ସମ୍ପର୍କରେ ମେଣ୍ଟର ବରିଷ୍ଠ ନେତାମାନେ ଚୂଡ଼ାନ୍ତ ନିଷ୍ପତ୍ତି ନେବେ । କିନ୍ତୁ ଯେତେବେଳେ କଂଗ୍ରେସ ଏକାକୀ ଲଢିବାର ନିଷ୍ପତ୍ତିକୁ ଠିକ ବୋଲି ଭାବୁଛି, ସେତେବେଳେ ଆମ୍ ଆଦମୀ ପାର୍ଟିରେ ମେଣ୍ଟରେ ରହିବାର କୌଣସି ଅର୍ଥ ନାହିଁ ।