ନୂଆଦିଲ୍ଲୀ:ଇସ୍ରାଏଲ-ଗାଜା ଯୁଦ୍ଧ ମଧ୍ୟରେ ପାଲେଷ୍ଟାଇନ ସହର ବେଥଲେହେମରେ ଫସିଥିବା ୨୩ ଜଣ ମେଘାଳୟ ତୀର୍ଥଯାତ୍ରୀ ସୁରକ୍ଷିତ ଭାବେ ପଡୋଶୀ ମିଶର (ଇଜିପ୍ଟ)କୁୁ ସ୍ଥାନାନ୍ତରିତ ହୋଇଛନ୍ତି । ବିଦେଶ ମନ୍ତ୍ରଣାଳୟ ଓ ସେଠାରେ ଥିବା ଭାରତୀୟ ଦୂତାବାସର ସମ୍ବନ୍ବିତ ପ୍ରୟାସରେ ସମସ୍ତ ତୀର୍ଥଯାତ୍ରୀଙ୍କୁ ପଡୋଶୀ ଇଜିପ୍ଟରେ ସୁରକ୍ଷିତ ପହଞ୍ଚାଯାଇଥିବା ସୂଚନା ଦେଇଛନ୍ତି ମେଘାଳୟ ମୁଖ୍ୟମନ୍ତ୍ରୀ କନରାଡ ସାଙ୍ଗମା । ଏକ୍ସରେ ଟ୍ବିଟ କରି ସାଙ୍ଗମା କହିଛନ୍ତି,‘‘ ଯୁଦ୍ଧ ଜୋନରେ ଏହି ୨୭ ପର୍ଯ୍ୟଟକ ଫସି ରହିଥିଲେ । ବିଦେଶ ମନ୍ତ୍ରଣାଳୟ ଓ ଭାରତୀୟ ଦୂତାବାସ ସହଯୋଗରେ ସେମାନଙ୍କୁ ସୁରକ୍ଷିତ ଭାବେ ଇଜିପ୍ଟକୁ ନିଆଯାଇଛି ।’’
ପୂର୍ବରୁ ସୋସିଆଲ ସାଇଟ ଏକ୍ସରେ ମୁଖ୍ୟମନ୍ତ୍ରୀ ସାଙ୍ଗମା କହିଥିଲେ, ଜେରୁଜେଲମକୁ ତୀର୍ଥଯାତ୍ରାରେ ଯାଇଥିବା ମେଘାଳୟର ଏହି ୨୭ ପର୍ଯ୍ୟଟକ ପାଲେଷ୍ଟାଇନ ସହର ବେଥଲେହେମରେ ଫସି ରହିଛନ୍ତି । ତେବେ ଇସ୍ରାଏଲର ଟେଲ-ଆଭିଭରେ ଅବସ୍ଥାପିତ ଭାରତୀୟ ଦୂତାବାସ ପକ୍ଷରୁ ମିଳିଥିବା ଉଭୟ ଇସ୍ରାଏଲ ଓ ଗାଜାରେ ଥିବା ଭାରତୀୟ ନାଗରିକଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା କେହି ମୃତାହତ ହୋଇଥିବା ନେଇ ସୂଚନା ନାହିଁ । କିଛି ସ୍ଥାନରୁ ସେମାନେ ସୁରକ୍ଷିତ ପ୍ରସ୍ଥାନ କରିବା ପାଇଁ ଦୂତାବାସ ସହ ସମ୍ପର୍କରେ ରହିଛନ୍ତି । ସ୍ଥାନାନ୍ତରଣ ପାଇଁ ଏକାଧିକ ଅନୁରୋଧ ମଧ୍ୟ ଦୂତାବାସ ନିକଟକୁ ଆସିବା ପରେ କାର୍ଯ୍ୟକ୍ରମ ହାତକୁ ନିଆଯାଉଛି । ତେବେ ଉଭୟ ସ୍ଥାନରେ ଥିବା ପ୍ରବାସୀ ଭାରତୀୟ, ତୀର୍ଥଯାତ୍ରୀ ଓ ପର୍ଯ୍ୟଟକଙ୍କୁ ସୁରକ୍ଷିତ ସ୍ଥାନରେ ରହିବା ସହ ବାହାରକୁ ନବାହାରିବା ପାଇଁ ଦୂତାବାସ ପକ୍ଷରୁ କୁହାଯାଇଛି । ଗତକାଲି ଆକ୍ରମଣ ଆରମ୍ଭ ହେବା ପରେ ଇସ୍ରାଏଲରେ ଥିବା ଦୂତାବାସ ଜରୁରୀକାଳୀନ ନମ୍ବର ସହ ନିଜ ନାଗରିକଙ୍କ ପାଇଁ ଗାଇଡଲାଇନ ଜାରି କରିଥିଲା ।