ଚେନ୍ନାଇ:ପୁରୁଷମାନେ ମହିଳାଙ୍କ ଅପେକ୍ଷା ଶାରୀରିକ ଭାବେ ଅଧିକ ଶସକ୍ତ । ପୁରୁଷମାନେ ଯେଉଁ କଠିନ କାର୍ଯ୍ୟ କରିପାରନ୍ତି, ତାହା ମହିଳାଙ୍କ ଦ୍ବାରା ହେବା ସମ୍ଭବ ନୁହେଁ । ଏପରି କିଛି ପୂର୍ବପ୍ରଚଳିତ ଧାରଣା ପୁରୁଷ ପ୍ରାଧାନ୍ୟ ସମାଜରେ ଏବେ ମଧ୍ୟ ରହିଛି । ହେଲେ ବିଭିନ୍ନ କଠିନ କ୍ଷେତ୍ରରେ ମଧ୍ୟ ପୁରୁଷଙ୍କ ଭଳି ମହିଳାମାନେ ଦକ୍ଷତାର ସହ କାର୍ଯ୍ୟ କରିପାରନ୍ତି, ସେ ନେଇ କିଛି ଉଦାହରଣ ମଧ୍ୟ ଆମେ ଦେଖିଛେ । ସେମିତି ଏକ ଘଟଣା ତାମଲନାଡୁର କୋଏମ୍ବାଟୁର ସହରରେ ମଧ୍ୟ ଦେଖିବାକୁ ମିଳିଛି । ଜଣେ 24 ବର୍ଷୀୟା ଯୁବତୀ ଚାକିରିକୁ ଅପେକ୍ଷା ନକରି ବସ ଡ୍ରାଇଭିଂ କରୁଛନ୍ତି । ତାଙ୍କୁ ସହରର ପ୍ରଥମ ମହିଳା ବସ ଡ୍ରାଇଭର ମଧ୍ୟ କୁହାଯାଉଛି ।
କୋଏମ୍ବାଟୁରର 24 ବର୍ଷୀୟା ଶର୍ମିଲା ଚଳାଉଛନ୍ତି ବସ । ଜଣେ କମ ବୟସର ଯୁବତୀ ପୁରା ପେଶାଦାର ବସ ଡ୍ରାଇଭର ପରି ଯାତ୍ରୀ ପରିବହନ କରୁଛନ୍ତି । ଯାତ୍ରୀମାନେ ମଧ୍ୟ ତାଙ୍କ ବସରେ ଯାତ୍ରା କରିବା ପାଇଁ ବେଶ ଉତ୍ସାହୀ ମଧ୍ୟ । ବସଯାତ୍ରୀ ତ ପୁଣି ଅନ୍ୟ ବସର କର୍ମଚାରୀ ଶର୍ମିଲାଙ୍କ ସହ ସେଲ୍ଫି ନେଉଛନ୍ତି । ଶର୍ମିଳାଙ୍କ ବସ ଡ୍ରାଇଭିଂ କରିବା ପଛରେ ରହିଛି ତାଙ୍କ ପରିବାରର ସହଯୋଗ । କାରଣ ତାଙ୍କ ବାପା ମଧ୍ୟ ଜଣେ ଅଟୋ ଡ୍ରାଇଭର ଥିଲେ । ଶର୍ମିଲା ନିଜେ ମଧ୍ୟ କିଛି ବର୍ଷ ଅଟୋ ଚଳାଇ ସାରିଛନ୍ତି । ପରେ ସେ ଭାରୀଯାନ ଚଳାଇବା ପାଇଁ ଆଗ୍ରହ ପ୍ରକାଶ କରିଥିଲେ । ଏଥିରେ ତାଙ୍କ ବାପା ତାଙ୍କୁ ସାହାସ ଯୋଗାଇଥିଲେ । କିଛି ମାସର ପ୍ରଶିକ୍ଷଣ ପରେ ସେ ଏବେ ବସର ଡ୍ରାଇଭିଂ ସିଟରେ ।