ହାଇଦ୍ରାବାଦ: 'କଲ୍କି 2898 AD' ଚଳିତ ବର୍ଷର ବହୁ ପ୍ରତୀକ୍ଷିତ ଚଳଚ୍ଚିତ୍ର ମଧ୍ୟରୁ ଅନ୍ୟତମ । ଯାହାର ରିଲିଜକୁ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଛନ୍ତି । ଏହି ଚଳଚ୍ଚିତ୍ରରେ ଅମିତାଭ ବଚ୍ଚନ, ପ୍ରଭାସ, କମଲ ହାସନ, ଦୀପିକା ପାଦୁକୋନ ଏବଂ ଦିଶା ପାଟାନି ନଜର ଆସିବେ । ପୂର୍ବରୁ ନିର୍ମାତା ଫିଲ୍ମରୁ ଦୀପିକା ଏବଂ ପ୍ରଭାସଙ୍କ ଲୁକ ରିଲିଜ କରିଥିବା ବେଳେ ଗତକାଲି ସକାଳେ ଅମିତାଭ ବଚ୍ଚନଙ୍କ ଲୁକ ରିଲିଜ କରିଛନ୍ତି । ଏଥିସହ ସନ୍ଧ୍ୟାରେ ନିର୍ମାତା ବଡ଼ ଖୁଲାସା କରିବେ ବୋଲି ସୂଚନା ଦେଇଥିଲେ । ତେବେ ବବର୍ତ୍ତମାନ ସେହି ଅପେକ୍ଷାର ଅନ୍ତ ହୋଇଛି । ଫିଲ୍ମରେ ବିଗ ବିଙ୍କ ଚରିତ୍ର ଉପରୁ ପରଦା ଉଠାଇଛନ୍ତି ନିର୍ମାତା । ସେ ଅଶ୍ୱତ୍ଥାମା ଭାବେ ଏହି ଫିଲ୍ମରେ ନଜର ଆସିବେ ।
ଫିଲ୍ମର ଏକ ଛୋଟିଆ ୨୧ ସେକେଣ୍ଡର ଟିଜର ଭିଡିଓ ସେୟାର କରାଯାଇଥିଲା । ଯେଉଁଥିରେ ଦେଖିବାକୁ ମିଳିଛି ଯେ, ହ୍ୱାଇଟ କପଡ଼ା ପିନ୍ଧିଥିବା ଜଣେ ବ୍ୟକ୍ତି ଗୁମ୍ଫାରେ ବସି ଶିବ ଲିଙ୍ଗଙ୍କୁ ପୂଜା କରୁଛନ୍ତି । ତା’ପରେ ଏକ ଶିଶୁର ସ୍ୱର ଶୁଣାଯାଏ, ତାଙ୍କୁ ପଚରାଯାଏ ତୁମର ମୃତ୍ୟୁ ଘଟିବ ନାହିଁ କି? ତୁମେ କଣ ଦିବ୍ୟ କି? ତୁମେ କିଏ? ଏହା ପରେ ଅମିତାଭ ବଚ୍ଚନ କୁହନ୍ତି ଯେ ମୁଁ ଦ୍ରୋଣାଚାର୍ଯ୍ୟଙ୍କ ପୁତ୍ର ଅଶ୍ୱତ୍ଥାମା । ଏହାପୂର୍ବରୁ ନିର୍ମାତା 'କଲ୍କି 2898 AD'ରୁ ଅମିତାଭ ବଚ୍ଚନଙ୍କ ଏକ ଲୁକ ପୋଷ୍ଟର ରିଲିଜ କରିଥିଲେ ଏବଂ ସେ କିଏ ବୋଲି ଜାଣିବାର ସମୟ ଆସିଛି ବୋଲି କହିଥିଲେ । ବର୍ତ୍ତମାନ ନିର୍ମାତା ତାହା ଉପରୁ ପରଦା ଉଠାଇଛନ୍ତି ।