ठाणे:कळवा-मुंब्रा स्थानकाच्या दरम्यान शनिवारी दिव्यांग प्रमोद वाडेकर (३५) याच्या अंगावर पेटता रुमाल टाकला. यामुळे दिव्यांग वाडेकर हा जखमी झाला. त्याच्या डाव्या हाताला होरपळले. आग विझविण्याच्या खटाटोपात उजवा हात जखमी झाला. विकलांग अल्पवयीन आरोपीने मुंब्रा स्थानकावरून पोबारा केला. ठाणे लोहमार्ग पोलीस ठाण्यात गुन्हा दाखल झाला. पोलिसांनी आरोपीला २४ तासात बेड्या ठोकल्या. त्याच्या चौकशीत त्याच्यावर यापूर्वीच मोबाईल चोरीचे दोन गुन्हे दाखल असल्याचे समोर आले. तर विकलांग आरोपी हा नशेडी असून नशेची झिंग पुरविण्यासाठी तो सोल्युशन या ज्वलनशील पदार्थाचा वापर करीत होता. घटनेच्या दिवशी त्याच्याकडे नशेसाठी असलेले सोल्युशन रुमालावर टाकून पेटवून रुमाल दिव्यांग वाडेकर याच्या अंगावर टाकला आणि घटना घडली.
चोरी करताना अपंगत्व आले:मुंब्रा स्थानकावरून आरोपी याने पलायन केल्याची माहिती ठाणे लोहमार्ग पोलिसांना फिर्यादी दिव्यांग प्रमोद वाडेकर यांनी दिली. वाडेकर यांनी केलेल्या वर्णनावरून लोहमार्ग पोलिसांचा तपास सुरु झाला. मुंब्रा स्थानकावरील सिसितीव्हीच्या माध्यमातून आरोपीचा मागोवा ठाणे लोहमार्ग पोलिसांनी घेत पोलीस संभावित ठिकाणी भिवंडीत पोहचले. तांत्रिक अभ्यास आणि सीसीटीव्हीच्या मदतीने ठाणे लोहमार्ग पोलिसांनी अखेर आरोपीला अटक केली. अल्पवयीन विकलांग आरोपी विरुद्ध रेल्वे पोलीस ठाण्यात दोन मोबाईल चोरीचे गुन्हे दाखल असल्याचे वापोनि पंढरी कांदे यांनी सांगितले. तर मोबाईल चोरी करताना त्याला अपघातात आपला पाय गमवावा लागला असल्याचेही समोर आले.