कराड (सातारा) -झी मराठी वाहिनीवरील गाजलेल्या 'लागिर झालं जी' या मालिकेतील 'जिजी' अर्थात कमल ठोके यांचे काल अल्पशा आजाराने बंगळुरूत निधन झाले. त्यांचे पार्थिव आज सकाळी कराड येथे येणार असून कराडमधील स्मशानभूमीत त्यांच्या पार्थिवावर अंत्यसंस्कार करण्यात येणार आहे.
कमल ठोके या सेवानिवृत्त शिक्षिका होत्या. त्यांनी कराड तालुक्यातील वसंतगड, सैदापूर, गोवारे अशा अनेक गावांमध्ये शिक्षिका म्हणून सेवा बजावली होती. नोकरी करत असतानाच त्या नाटकातही काम करत होत्या. तसेच, त्यांना गायनाचीही आवड होती. झी मराठी वाहिनीवरील 'लागिर झालं जी' या मालिकेतील नायक आज्याच्या आज्जीची भूमिका त्यांनी साकारली होती.