सांगली - कृष्णा, कोयना आणि चांदोली पाणलोट क्षेत्रात संततधार पाऊस अद्याप सुरूच आहे. तर कोयना आणि चांदोली धरणातून पाण्याचा विसर्ग करण्यात येत असल्याने कृष्णा आणि वारणा नद्यांच्या पाणी पातळीत झपाट्याने वाढ झाली आहे.
सांगलीत 'कृष्णा'ने ओलांडली इशारा पातळी, नदीकाठच्या कुटुंबांचे स्थलांतर सांगलीमध्ये आयर्विन पूल या ठिकाणी कृष्णा नदीची पाणीपातळी सकाळी 9:30 वाजता 40.8 फुटांवर पोहोचली होती. त्यामुळे, सखल भागात असणाऱ्या दत्तनगर, काकानगर आणि सूर्यवंशी प्लॉट येथील घरांमध्ये पुराचं पाणी शिरलं आहे. येथील 20 ते 25 कुटुंबांना पालिका प्रशासनाने सुरक्षित स्थळी हलवले आहे.
कृष्णा नदीच्या वाढलेल्या पाणीपातळीमुळे पलूस तालुक्यातील भिलवडी येथील कृष्णा नदीवरील पूल पाण्याखाली गेला आहे. त्यामुळे भिलवडी-अंकलखोप मार्गावरील वाहतूक बंद झाली आहे. तर, भिलवडीच्या बाजारपेठेमध्ये कृष्णा नदीचे पाणी शिरले आहे. या ठिकाणी असणाऱ्या मौलानानगर आणि वसंतदादानगर येथील सुमारे 50 कुटुंबांचे सुरक्षित स्थळी स्थलांतर करण्यात आले आहे.
औदुंबर मधील दत्त मंदिर पाण्याखाली गेले आहे. तर वाळवा तालुक्यातील ताकारी येथील पूल कृष्णा नदीच्या वाढलेल्या पाणी पातळी मुळे वाहतुकीसाठी बंद करण्यात आला आहे. त्यामुळे ताकारी-बोरगाव मार्गावरील वाहतूक ठप्प झाली आहे. मिरज तालुक्यातील ढवळी येथे सुमारे पंधरा घरांना पुराच्या पाण्याचा वेढा पडला आहे. या ठिकाणी असणाऱ्या नागरिकांना अन्यत्र हलविण्यात आले आहे, तर इथल्या ढवळी आणि म्हैसाळ गावांचा संपर्क तुटला आहे.
