रायगड - मुंबईच्या एसआयडी विभागातून रायगडमध्ये बदली होऊन आलेले सहाय्यक पोलीस निरीक्षक प्रशांत कणेरकर यांनी आत्महत्येपूर्वी लिहिलेल्या सुसाईड नोटमध्ये काही मोठ्या अधिकाऱ्याची नावे असल्याची माहिती सूत्रांकडून समजते. त्यामुळे जिल्हा पोलीसदेखील ही बाब दडवून ठेवण्याचा प्रयत्न करत आहेत.
पोलीस प्रशांत कणेरकर यांच्या पत्नी आणि इतर कुटुंबीयांनाही मीडियाला भेटू देत नसल्याने संशयाचे वातावरण निर्माण झाले आहे. सुसाईड नोट बाहेर आल्यास यात कोणत्या बड्या अधिकाऱ्याची नावे आहेत. हेही समोर येऊ शकते. यामुळे या बड्या अधिकाऱ्यांना वाचविण्याचा प्रयत्न तर पोलीस करत नाहीत ना, असा संशय निर्माण झाला आहे. प्रशांत कणेरकर हे पोलीस प्रशासन व्यवस्थेचे बळी ठरले आहेत, हे मात्र नक्की. त्यामुळे कणेरकर यांच्या कुटुंबाला न्याय मिळेल का, असा प्रश्नही निर्माण झाला आहे.
सहाय्यक पोलीस निरीक्षक कणेरकरांच्या सुसाईड नोटचे गौडबंगाल वाचा - रायगड: आजाराला कंटाळून रुग्णाची तिसऱ्या मजल्यावरून उडी मारून आत्महत्या
सहाय्यक पोलीस निरीक्षक प्रशांत कणेरकर हे मुंबई येथे एसआयडी विभागात गेली 15 ते 20 वर्षे कार्यरत होते. तीन महिन्यांपूर्वी कणेरकर यांची रायगड येथे बदली करण्यात आली होती. मात्र या बदलीमुळे कणेरकर हे प्रचंड दडपणाखाली होते. कणेरकर यांना पोलीस ठाण्यातील कामाचा कोणताच अनुभव नव्हता. यासाठी जिल्हा पोलीस अधीक्षक यांनी कणेरकर यांना अर्ज शाखेत बदली दिली होती.
प्रशांत कणेरकर हे कामावर रुजू झाल्यानंतर पंधरा दिवस रजा टाकून दादर येथे आपल्या घरी गेले होते. कणेरकर यांनी आपल्या मित्राला परिस्थितीबाबत बोलून आत्महत्या करणार असल्याचे बोलून दाखविले होते. त्यावेळी मित्रानेही टोकाची भूमिका घेऊ नकोस, असे सूचित केले होते. कणेरकर हे मानसिक दडपणात असूनही पंधरा दिवस कुटूंबाबरोबर मौज मजेत घालवून 14 ऑगस्ट रोजी कामावर रुजू झाले. यानंतर 16 ऑगस्टला कणेरकर यांनी फॅनला लटकून आत्महत्या केली.
मानसिकदृष्ट्या तणावाखाली असलेल्या कणेरकर यांनी आत्महत्या करण्यापूर्वी सुसाईड नोट लिहून ठेवली होती. या सुसाईड नोटमध्ये कणेरकर यांनी मी आत्महत्या का करत आहे, याबाबत लिहिले असून छळ करणाऱ्या काही मोठ्या अधिकाऱ्याची नावेही लिहिली आहेत. त्यामुळे या अधिकाऱ्यांवर संशयाची सुई फिरत आहे. कणेरकर यांनी आत्महत्या करून दहा दिवस उलटले आहेत. मात्र सुसाईड नोट देण्यास पोलीस लपवाछपवी करत आहेत. त्यामुळे जिल्हा पोलीस हे प्रकरण दाबण्याचा प्रयत्न करीत आहेत का? असा प्रश्न उपस्थित झाला आहे. मात्र बड्या अधिकाऱ्यांच्या छळवणुकीने नाहक कर्तव्यनिष्ठ पोलीस अधिकारी कणेरकर यांना आपला जीव गमवावा लागला आहे. त्यामुळे आपल्याच सहकाऱ्याला न्याय मिळवून देण्यास जिल्हा पोलीस प्रशासन तपासात तत्परता दाखवेल का, असा प्रश्नही उपस्थित झाला आहे.
