पुणे - दिवाळी पाडव्याची मंगलमय संध्याकाळ, तुतारीची ललकारी, सनई-चौघड्यांचा मंगलमय सूर आणि स्वराज्य घराण्यांच्या वंशजांनी केलेला शिवछत्रपतींचा जयघोष, अशा शिवमय झालेल्या वातावरणात तिमिरातून तेजाकडे नेणाऱ्या अष्टसहस्र पणत्यांच्या लखलखाटात छत्रपती शिवाजी महाराजांच्या विश्वातील पहिल्या भव्यदिव्य अश्वारूढ स्मारकापाशी दीपोत्सव साजरा झाला.
शिवजयंती महोत्सव समितीच्या वतीने आयोजित श्री छत्रपती शिवाजी महाराज दीपोत्सव २०२१, पर्व १० यानिमित्ताने हा कार्यक्रम साजरा करण्यात आला. श्री शिवछत्रपती स्मारक, एसएसपीएमएस संस्था प्रांगण येथे आयोजित या दीपोत्सवाचे उद्घाटन पुणे शहर पोलीस सहआयुक्त डॉ.रवींद्र शिसवे, दिवंगत श्रीमती लक्ष्मीबाई दगडूशेठ हलवाई मंदिराचे विश्वस्त अॅड. प्रताप परदेशी, समितीचे आद्य प्रवर्तक संस्थापक अध्यक्ष अमित गायकवाड यांसह शिवजन्मोत्सव स्वराज्यरथ सोहळ्यात सहभागी झालेल्या स्वराज्य घराण्यांच्या हस्ते झाले.
विविध मान्यवरांचा करण्यात आला गौरव -
शिवजयंती १९ फेब्रुवारीला स्वराज्यघराण्यांची वज्रमुठ निर्माण करणाऱ्या ऐतिहासिक सार्वजनिक शिवजन्मोत्सव स्वराज्यरथ सोहळ्यात सहभागाची यशस्वी ५ वर्षे पूर्ण केल्याबद्दल सरनौबत नागोजीराव कोकाटे, श्रीमंत माने सरकार, सरदार हिरोजी इंदलकर, श्रीमंत सरदार राऊतराव ढमाले, श्रीमंत सरदार दयाजीराव मारणे गंभीरराव, सप्तसहस्त्री सरदार नावजी बलकवडे, वीर माता धाराऊ गाडे, समुद्रस्वामी दयार्सारंग सरखेल कान्होजी आंग्रे, सरदार शिवाजी इंगळे, भोई स्वराज्यबांधव, राजे लखोजीराव जाधवराव या स्वराज्यघराण्यांचा अखंड भारताच्या स्वाभिमानाचे प्रतीक श्री शिवछत्रपतींचा जिरेटोप देऊन विशेष गौरव करण्यात आला.तसेच यंदा सहभागी झालेल्या स्वराज्यनिष्ठ येसाजी कामठे, श्रीमंत हरजीराजे बर्गे, शिवरायांचे शिलेदार डिंबळे, श्रीमंत तापकीर सरदार, वीर सरदार मालोजी भिलारे, पानीपत वीर महादजी माळवदकर, पानीपत वीर महादजी व दादजी हरपळे, प्रतापगड युध्दवीर सहस्त्री सरदार कोडांजी वरखडे, दक्षिण दिग्वीजय वीर मानाजी मोरे या स्वराज्यघराण्यांचा दीपोत्सवाचे सन्मानचिन्ह देऊन विशेष सत्कार करण्यात आला.