भिमाशंकर येथे त्रिपुरा पौर्णिमेनिमित्त करण्यात आली विद्युत रोषणाई

बारा ज्योतिर्लिंगांपैकी एक असलेल्या भिमाशंकर येथे त्रिपुरा पौर्णिमेनिमित्त रात्री विद्युत रोषणाई करण्यात आली. या रोषणाईमुळे संपूर्ण मंदिर परिसर लखलखीत झाले होते. आज संध्याकाळी देशभरातील अनेक भाविक या ठिकाणी होणाऱ्या दिपोत्सवाला हजेरी लावण्याची शक्यता आहे.

पुणे- बारा ज्योतिर्लिंगांपैकी एक असलेल्या भिमाशंकर येथे त्रिपुरा पौर्णिमेनिमित्त रात्री विद्युत रोषणाई करण्यात आली. या रोषणाईमुळे संपूर्ण मंदिर परिसर लखलखीत झाले होते. आज संध्याकाळी देशभरातील अनेक भाविक या ठिकाणी होणाऱ्या दिपोत्सवाला हजेरी लावण्याची शक्यता आहे.

एका कथेनुसार विष्णुदेवांच्या वरानी उन्मत्त झालेल्या त्रिपूर नावाच्या बलाढ्य असुराचा शिवशंकरांनी कार्तिक पौर्णिमेला नाश केला होता. त्यावेळी आजच्या दिवशी श्री. क्षेत्र भिमाशंकर येथे त्रिपुराच्या त्रासातून मुक्त झालेल्या प्रजेने आनंद व्यक्त करण्यासाठी दिपोत्सव केला. ही घटना कार्तिक पौर्णिमेच्या दिवशी घडली होती. त्यामुळे आजच्या दिवसाला त्रिपुरारी पौर्णिमा म्हणतात. त्रिपुरारी पौर्णिमेला घराघरात, परिसरात, मंदिरातील दीपमाळेत दिवे लावले जातात.

त्याचबरोबर, कथेनुसार तारकासूर नावाच्या असुराला ताराक्ष, कमलाक्ष व विद्युन्माली असे तीन पुत्र होते. तारकासुराच्या या तीन पुत्रांनी देवादिकांना छळण्यास सुरुवात केली. हा प्रकार असह्य झाल्याने महादेवांनी त्यांच्याशी संग्राम करून त्या तिन्ही पुत्रांचा, म्हणजे त्रिपुरांचा बिमोड केला. असूर शक्तीचा नाश झाल्यामुळे देवांनी दिपोत्सव केला. हिच परंपरा आजही तशीच सुरू आहे. देशभरातून अनेक भाविक, पंडीत भिमाशंकर मदिराला हजेरी लावतात.

हेही वाचा-व्हॉट्सअॅप स्टेट्स पाहून चोरले ३ कोटी रुपयांचे सोने