जुन्नर (पुणे) - जिल्ह्यातील सर्वाधिक मृत्यूदर जुन्नर तालुक्यात असल्याने प्रशासन दिवसरात्र मेहनत घेऊन हा दर कमी करण्यासाठी प्रयत्न करत आहे. अशातच नारायणगाव येथील ग्रामीण रुग्णालयात उभारलेल्या कोव्हिड केअर सेंटरमध्ये एक धक्कादायक प्रकार समोर आला आहे. ऑक्सिजन बेडसाठी असलेल्या व्हेंटिलेटरला, ऑपरेटर नसल्याचे कारण देऊन बेड उपलब्ध नसल्याचे सांगण्यात येत आहे. यासह रुग्णांना खाजगी रुग्णालयात दाखल केले जात असून खाजगी रुग्णालयातून रुग्णांची लुट होत आहे, हा प्रकार जिल्हा परिषद सदस्य आशा बुचके यांनी कोविड सेंटरमध्ये जाऊन उघड केला आहे.
कोविड सेंटरमधील धक्कादायक प्रकार रुग्णालयामध्ये बेड उपलब्ध असूनही बेड शिल्लक नसल्याचे तेथील डॉक्टरने रुग्णाच्या नातेवाईकाना सांगीतले. यामुळे नातेवाईकांची धावपळ उडाली आणि तालुक्यात कुठेही बेड न मिळाल्याने कोरोना पॉझिटिव्ह असलेल्या जुन्नरच्या एका शिक्षकाला अखेर चाकणला शिफ्ट करावे लागले. या कोरोना रुग्णाची ही व्यथा याच मतदार संघाच्या जिल्हा परिषद सदस्या आशाताई बुचके यांच्या कानावर गेल्यावर त्यांनी रविवारी सायंकाळी थेट रूग्णालय गाठले. यानंतर त्यांनी डॉक्टरांच्या हलगर्जी पणाची पोलखोल केली आहे. प्रकरणी जुन्नर मतदार संघाच्या आमदारांनी या धक्कादायक प्रकारावर नाराजी व्यक्त केली आहे. यासह रुग्णालयाची पाहणी करुन रुग्णांची लुट करणाऱ्यांवर कडक कारवाई करू, असे आमदार अतुल बेनके यांनी सांगितले.
हेही वाचा -अजित पवारांनीच केला शरद पवारांचा गेम - निलेश राणे
कोविड सेंटरमध्ये स्थानिक डॉक्टरांनाही सेवा देता यावी यासाठी प्रशासनाकडून खासगी डॉक्टरांची सेवा अधिग्रहीत करण्यात आली. मात्र, याच डॉक्टरांकडून असा गैरप्रकार होत असल्याने नागरिकांकडून संताप व्यक्त केला जात आहे.
हेही वाचा -केंद्रीय सशस्त्र पोलीस दलामध्ये एक लाखापेक्षा अधिक जागा रिक्त
