पुणे -जेजुरीजवळ भाविकांच्या बसचा अपघात झाला. या अपघातात सात जण गंभीर जखमी झाले,तर वीस जण किरकोळ जखमी आहेत. भाविक बसमधून मोरगावच्या गणपतीचे दर्शन घेऊन जेजुरीला जात होते. यावेळी जेजुरीकडे जाताना मोरगाव रस्त्यावरील काळा ओढ्याजवळ बस पलटी झाली.
पोलिसांनी दिलेल्या माहितीनुसार, औरंगाबाद, बीड आणि जालना जिल्ह्यातील काही भाविक एका खासगी बसने देवदर्शनासाठी निघाले होते. सकाळी मोरगाव येथील गणेशाचे दर्शन घेऊन ही बस जेजुरीच्या दिशेने निघाली होती. जेजुरीजवळ काळा ओढा परिसरात चालकाचे नियंत्रण सुटल्याने ही बस पलटी झाली. सुदैवाने यात जीवितहानी झाली नाही. मात्र, सात भाविक गंभीर जखमी झाले आहेत. गंभीर जखमींना ससून रुग्णालयात तर उर्वरित जखमींना जेजुरी येथील ग्रामीण रुग्णालयात दाखल करण्यात आले आहे.