Baby Girl Honoured With Gold Coin : कन्यारत्नास सोन्याचे नाणे, जिलेबी देऊन सन्मान; परभणीच्या सन्नीसिंह यांचा नववर्ष उपक्रम

सन्नी सिंह हे गेल्या दहा वर्षांपासून स्त्री भ्रूण हत्या थांबाव्यात, या उद्देशाने नववर्षाच्या पहिल्या दिवशी कन्यारत्न जन्म देणाऱ्या शहरातील सर्व हॉस्पिटलमधील महिलांना प्रत्येकी दोन किलो जिलेबी भेट देतात. शिवाय त्यातून एका भाग्यवान मातेला सव्वा ग्राम सोन्याचे नाणे देखील भेट ( Baby Girl Honoured With Gold Coin ) देतात. यावर्षी देखील त्यांचा हा उपक्रम उत्साहात पार पडला.

परभणी - समाजातील अनिष्ट रूढी आणि परंपरा यांना छेद देण्याचे काम सामाजिक कार्यकर्तेच करतात असे नाही, तर ते काम एखादा सामान्य माणूसही करू शकतो. याचे जीवंत उदाहरण म्हणून परभणीतील जिलेबी विक्रेता सन्नी सिंह यांच्याकडे पाहता येईल. सन्नी सिंह हे गेल्या दहा वर्षांपासून स्त्री भ्रूण हत्या थांबाव्यात, या उद्देशाने नववर्षाच्या पहिल्या दिवशी कन्यारत्न जन्म देणाऱ्या शहरातील सर्व हॉस्पिटलमधील महिलांना प्रत्येकी दोन किलो जिलेबी भेट देतात. शिवाय त्यातून एका भाग्यवान मातेला सव्वा ग्राम सोन्याचे नाणे देखील भेट ( Baby Girl Honoured With Gold Coin ) देतात. यावर्षी देखील त्यांचा हा उपक्रम उत्साहात पार पडला.

लक्की ड्रॉ काढून एका कुटुंबाला भेट -

नवीन वर्षाच्या पहिल्या दिवशी म्हणजेच 1 जानेवारीला कन्यारत्नाला जन्म देणार्‍या एका भाग्यवान कुटुंबाला येथील हरियाणा जिलेबीचे चालक सन्नी धरमवीरसिंह दामोदर यांच्याकडून सव्वा ग्रॅम सोन्याचे नाणे आणि 2 किलो जिलेबी भेट देण्यात येते. त्यांचा हा उपक्रम मागील 10 वर्षांपासून सुरू आहे. त्यानुसार यावेळी देखील 1 जानेवारी 2022 या दिवशी त्यांनी जिल्हा रुग्णालयात कन्यारत्नास जन्म देणाऱ्या 13 कुटुंबांमधून लक्की ड्रॉ काढून एका कुटुंबाला ही भेट देऊन त्यांचा सन्मान केला.

40 वर्षांपासून जिलेबीच्या व्यवसायात -

परभणी येथील स्टेशन रोडवरील हरियाणा जिलेबी या छोट्याशा दुकानाचे चालक म्हणजे धरमवीरसिंह व त्यांचा मुलगा सन्नी सिंह हे दोघेजण मागील 40 वर्षांपासून आपले जिलेबीचे दुकान चालवतात. या ठिकाणी व्यवसाय करत असतांना आपण काही समाजोपयोगी काम केले पाहिजे, असा त्यांचा विचार असायचा. त्यातूनच त्यांच्या डोक्यात ही कल्पना आली.

...म्हणून हा केला निश्‍चय -

दहावर्षांपुर्वी महाराष्ट्रात मोठ्या प्रमाणात स्त्री भ्रूण हत्येची प्रकरणे गाजत होती. सर्रासपणे मोठ्या प्रमाणात मुलींच्या गर्भातच हत्या केल्या जायच्या. त्यामुळे मुला-मुलींच्या प्रमाणात मोठ्या प्रमाणात तफावत निर्माण झाल्याचे दिसून आले. या गोष्टीमुळे दुःखी झालेल्या सन्नी सिंह यांनी आपल्या माध्यमातून एक छोटासा समाजोपयोगी उपक्रम राबविण्याचा निश्‍चय केला. आणि वर्षातून एक दिवस नव्याने जन्मणार्‍या मुलींसाठी जिलेबी भेट देण्याचा निश्‍चय त्यांनी केला. तेंव्हापासून आजतागायत 1 जानेवारी या वर्षाच्या पहिल्या दिवशी कन्यारत्नास जन्म देणार्‍या कुटुंबाला 2 किलो जिलेबी भेट देण्याचा उपक्रम त्यांनी न चुकता राबवला आहे.

'हे' कुटूंब ठरले भाग्यवान -

जिल्हा रुग्णालयात मुलींना जन्म दिलेल्या 13 मतांच्या नावाचा लक्की ड्रॉ काढण्यात आला. यामध्ये जिनत सय्यद शाहरुख यांची चिठ्ठी निघाली. त्यांना जिल्हा रुग्णालयातील डॉ. आसिप खान यांच्या हस्ते हे सव्वा ग्रॅम सोन्याचे नाणे व दोन किलो जिलेबी देवून सन्मानीत करण्यात आले. तसेच यावेळी जिल्हा रुग्णालयातील 13 व खाजगी रुग्णालयात मुलींना जन्म दिलेल्या 9 अशा एकूण 24 कुटुंबांना दोन किलो जिलेबी भेट देण्यात आली. यावेळी अजम खान, डॉ. आसिप खान, विष्णु कोरडे, चंदन गायकवाड व सन्नी सिंह यांची उपस्थिती होती.

हेही वाचा -Mother Son Fell from Train : भंडाऱ्यात धावत्या रेल्वेतून पडून आई आणि मुलाचा मृत्यू