नाशिक- मुंबई-आग्रा महामार्गावरील बळी महाराज मंदिराच्या पार्कींगमधून दुचाकी चोरल्याची घटना समोर आली आहे. ही घटना सीसीटीव्ही कॅमेऱ्यामध्ये कैद झाली असून पंचवटी पोलीस ठाण्यात चोरीचा गुन्हा दाखल करण्यात आला आहे.
गुणवंत देशमुख यांची दुचाकी (एम.एच १५ सी. एल ७२२७) मुंबई-आग्रा महामार्गवरील बळी महाराज मंदिराच्या पार्किंगमध्ये उभी होती. दरम्यान एक अज्ञात तरुण तेथे आला. त्याने त्याच्या जवळच्या बनावट चावीने काही गाड्यांचे लॉक खोलण्याचा प्रयत्न केला. मात्र, त्याला यात यश मिळाले नाही. परंतु, गुणवंत देशमुख यांच्या गाडीचे लॉक खोलण्यात तो यशस्वी झाला. त्यानंतर तो तरुण पार्किंगमधून गाडी घेऊन पसार झाला. ही घटना सीसीटीव्ही कॅमेऱ्यात कैद झाली आहे. याप्रकरणी पंचवटी पोलिसात गुन्हा दाखल करण्यात आला आहे.
दुचाकी चोरांनी शहरात उच्छाद मांडला असून या प्रकारामुळे वाहन चालक हैरान झाले आहेत. एकूणच नाशिकमध्ये वाढती गुन्हेगारी रोखण्यासाठी पोलीस प्रशासन अयशस्वी ठरत असल्याचे दिसत आहे. गुन्हेगारांना पोलिसांचा धाक उरला नासल्याचे चित्र शहरात दिसून येते आहे.