महाराष्ट्र

maharashtra

ETV Bharat / state

उपराष्ट्रपती धनखड यांच्या वक्तव्यावर राऊतांचा पलटवार; 2024 नंतर महापुरुष, युगपुरुष कोण ते कळणार

Sanjay Raut on Jagdip Dhankad : शिवसेना (उबाठा गट) चे खासदार संजय राऊत यांनी उपराष्ट्रपती जयदीप धनखड यांच्यावर निशाना साधलाय. एका कार्यक्रमात बोलताना धनखड यांनी महात्मा गांधी महापुरुष होते, तर पंतप्रधान नरेंद्र मोदी युगपुरुष असल्याचं वक्तव्य केलं होतं.

Sanjay Raut on Jagdip Dhankad
Sanjay Raut on Jagdip Dhankad

By ETV Bharat Marathi Team

Published : Nov 28, 2023, 8:03 PM IST

खासदार संजय राऊत यांची प्रतिक्रिया

मुंबईSanjay Raut on Jagdip Dhankad :उपराष्ट्रपती जयदीप धनखड यांनी काल मुंबईत एका कार्यक्रमात बोलताना महात्मा गांधी महापुरुष होते, तर पंतप्रधान नरेंद्र मोदी युगपुरुष असल्याचं वक्तव्य केलं होतं. त्यामुळं देशासह राज्यात राजकारण तापलं आहे. या मुद्द्यावर विरोधी पक्षाकडून नाराजी व्यक्त करण्यात येत आहे.

धनखड यांच्यावर टीका :उपराष्ट्रपती जगदीप धनखड म्हणाले की, महात्मा गांधी हे महापुरुष होते, तर पंतप्रधान नरेंद्र मोदी हे युगपुरुष आहेत. यावर उद्धव बाळासाहेब ठाकरे गटाचे खासदार संजय राऊत, विधानसभेचे विरोधी पक्षनेते विजय वडेट्टीवार यांनी धनखड यांच्या वक्तव्यांचा चांगलाच समाचार घेतला आहे. 2024 नंतर यांना महापुरुष कोण? युगपुरुष कोण? कळणार असल्याचा टोला खासदार संजय राऊत यांनी लगावला आहे. उपराष्ट्रपती धनखड यांनी काल मुंबईत जैन विचारवंत तसंच तत्त्वज्ञ श्रीमद राजचंद्र यांच्या जयंती सोहळ्याच्या कार्यक्रमात बोलताना पंतप्रधान नरेंद्र मोदी यांना या शतकातील युगपुरुष असं संबोधलं होतं. तसंच महात्मा गांधींना मागच्या शतकातील महापुरुष असल्याचं वक्तव्य त्यांनी केलं होतं.

समाजामध्ये विष पेरण्याचं काम :या मुद्द्यावर बोलताना विरोधी पक्ष नेते विजय वडेट्टीवार म्हणाले की, महात्मा गांधींची तुलना कोणासोबतच होऊ शकत नाही. आपण त्यांना बापू म्हणतो, राष्ट्रपिता म्हणतो. राष्ट्रपिता ही उपाधी महात्मा गांधींना जनतेनं दिली आहे. ती महात्मा गांधी यांनी स्वतःहून लावून घेतलेली नाही. राष्ट्रपिता या देशात दुसरे कोणी होऊ शकत नाही. गांधीच एकमेव राष्ट्रपिता राहतील. कुणाला कुणाची हुजरेगिरी, लाचारी करण्याची सवय असते. विष पेरण्याचं काम करणाऱ्यांना महात्मा उपाधी कधीच मिळणार नाही, असा मला विश्वास असल्याचं वडेट्टीवार यांनी म्हटलंय.

महापुरुष, युगपुरुष सोडा पुरुष महत्त्वाचा :शिवसेना उबाठा गटाचे खासदार संजय राऊत यांनी सुद्धा धनखड यांच्या वक्तव्यावर टीका केली आहे. ते म्हणाले की, 2024 नंतर कोण पुरुष आहे? कोण महापुरूष आहे? कोण युगपुरुष आहेत? हे त्यांना कळेल. तुम्हाला कोणी युगपुरुष ठरवण्याचा आधिकार दिला. युगपुरुष ठरवण्याचा अधिकार इतिहास तसंच विश्वातील जनता ठरवते. महात्मा गांधी यांना जगानं मानलं आहे. सत्तेत असलेले लोक पुरुष असते, तर जम्मू-काश्मीरमध्ये दिवसाढवळ्या आपले जवान मारले गेले नसते. चीननं लडाखमध्ये प्रवेश केला नसता. आम्ही पंतप्रधानांचा आदर करतो, कारण ते पंतप्रधान आहेत. मी पदाचा आदर करतो. म्हणून आपण पुरुषांना महापुरुष म्हणून परिभाषित करत नाही, जगानं महात्मा गांधींना महापुरुष बनवलं, असं म्हणत संजय राऊत यांनी धनखड यांच्या वक्तव्याचा समाचार घेतला.

काय म्हणाले होते उपराष्ट्रपती? :उपराष्ट्रपती जयदीप धनखड यांनी म्हटलं होतं की, राष्ट्रपिता महात्मा गांधींनी भारताला इंग्रजांच्या गुलामीतून मुक्त केलं, तर पंतप्रधान नरेंद्र मोदी यांनी देशाला दिशा दाखवली. म्हणूनच महात्मा गांधी हे मागच्या शतकातील महापुरुष, तर पंतप्रधान नरेंद्र मोदी हे आजच्या शतकातील युगपुरुष आहेत. तसंच महात्मा गांधींनी सत्याग्रह, अहिंसेच्या मार्गानं आपल्याला इंग्रजांच्या गुलामगिरीतून मुक्त केल्याचं धनखड यांनी म्हटलं होतं.

हेही वाचा -

  1. राज्य संकटात असताना, मुख्यमंत्री तेलंगाणात प्रचारात दंग; उद्धव ठाकरे यांचा एकनाथ शिंदेंवर हल्लाबोल
  2. तुमच्यासारखी माणसं सरकारच्या ताटाखालचं मांजर बनून खुर्चीवर बसलेत, संजय राऊतांचा नार्वेकरांवर घणाघात
  3. कार्डेलिया ड्रग्स प्रकरणात समीर वानखेडेंना दिलासा, 10 जानेवारीपर्यंत अटकेपासून संरक्षण

ABOUT THE AUTHOR

...view details