हिंगोली -शिव आणि पार्वती यांच्या विवाहाचा दिवस म्हणजे महाशिवरात्र या विवाहाच्या दिवशी आणि या पर्व कालामध्ये महाशिवरात्रीचे जेवढे काही उत्सव असतात ते विवाहाच्या निमित्ताने पार पाडले जातात. त्यानुसार 12 ज्योतिर्लिंगापैकी आठवे ज्योतिर्लिंग असलेल्या औंढा नागनाथ येथे नागनाथ मंदिरात तयारी करण्यात आली आहे. परराज्यातुन दाखल होणाऱ्या भाविकांना नागनाथाचे दर्शन अतीशय शांततेत घेता यावे म्हणून लांबलचक दर्शन रांग उभारण्यात आली आहे. कोणताही अनुचित प्रकार घडू नये म्हणून परिसरात मोठा पोलीस बंदोबस्त तैनात असून, सुरक्षेच्या दृष्टीकोनातून जागोजागी सीसीटीव्ही कॅमेरे ही बसवण्यात आलेले आहेत.
महाशिवरात्री म्हणजे भाविकांसाठी पर्वणीच असते. महाशिवरात्रीच्या पार्श्वभूमीवर औंढा नागनाथ येथे गेल्या अनेक वर्षांपासून यात्रा भरते, या यात्रा महोत्सवात देशभरातील विविध भागातून भाविक दाखल होतात. त्यानुसार नागनाथ संस्थांनच्या वतीने या महोत्सवाची तयारी केली जाते. मंदिर परिसरात करण्यात आलेली रंगरंगोटी, आकर्षक रोषणाई यासह मंदिर सजावट करण्यात आली आहे. महाशिवरात्रीच्या आदल्या दिवशीच याठीकाणी मोठ्या संख्येने भाविक दाखल झाले आहेत. हा महोत्सव तीन दिवस मोठ्या उत्साहात साजरा केला जातो. या ठिकाणी भाविकांना आवश्यक त्या सोई सुविधा उपलब्ध करून देण्यात आल्या आहेत.