गडचिरोली- येथील जनसंघर्ष समितीच्या वतीने जांभूळखेडा येथे भुसुरुंग स्फोटात हुतात्मा झालेल्या जवानांना आज श्रद्धांजली वाहण्यात आली. यावेळी घटनास्थळी १५ दीप प्रज्वलीत करण्यात आले. सोबतच उपस्थित लोकांनी मेणबत्ती लावून श्रद्धांजली अर्पण केली.
दादापूर येथे रस्ता बांधकामावरील वाहने जाळून नक्षलवाद्यांनी दहशत निर्माण करण्यासाठी गावभर फलक लावले होते. याठिकाणीही समितीचे कार्यकर्ते पोहोचून दहशतीचे प्रतीक असलेले फलक काढून जाळले. यावेळी नक्षलवाद मुर्दाबाद, लोकशाही जिंदाबाद, अशा घोषणा देण्यात आल्या. स्थानिकांच्या मनातील भीती दूर करण्याचा हा निर्भय प्रयत्न ठरला. यावेळी स्थानिक लोकांची उपस्थिती बरेच काही सांगून गेली.