बुलडाणा- नांदुरा बसस्थानकात तरुण-तरुणीला दोघांनी बेदम मारहाण केल्याचा व्हिडिओ व्हायरल झाला होता. प्रसार माध्यमांनी हा व्हिडिओ प्रसारीत केल्याने याची पोलिसांनी गंभीर दखल घेतली होती. अखेर मारहाण करणाऱ्या त्या दोन आरोपींना नांदुरा पोलिसांनी गुन्हा दाखल करून अटक केली आहे.
नांदुरा बसस्थानकावर प्रेमाच्या भावविश्वात रममान झालेल्या तरुण-तरुणीला 15 एप्रिलला बेदम मारहाण करण्यात आली होती. याबाबतचा व्हिडिओ सोशल मीडियावर व्हायरल झाला होता. यावर प्रसार माध्यमांनी हा व्हिडिओ प्रसारित केला. पोलिसांनी मारहाण झालेल्या नरेश समाधान इंगळे (22) रा. धानोरा महासिद्ध याच्या तक्रारीवरून गुन्हा दाखल केला आहे.
धानोरा येथून नांदुरा येथे 15 एप्रिलला एसटी बसने नोट्स घेण्यासाठी तो आला होता. यावेळी त्याला गावातील तरुणी बसस्थानकावर बसलेली दिसली. तो तिच्यासोबत बोलत असतानाच अनिल साहेबराव वानखडे व भीमराव वानखडे यांनी संशय घेऊन लाथाबु्क्यांनी त्याला मारहाण केली व रसवंतीवरील उसाने मारून जखमी केले. तसेच बेलाड फाट्यावरसुद्धा मारहाण केल्याची तक्रार नोंदविली. यावरून नांदुरा पोलिसांनी आरोपी साहेबराव वानखडे व भीमराव वानखडे यांच्या विरुद्ध वेगवेगळ्या कलमांखाली गुन्हे दाखल करून त्यांना अटक केली आहे.