बुलडाणा - मोदी और योगी का एक ही नारा "ना घर बसा हमारा ना बसने देंगे तुम्हारा", असे म्हणत राष्ट्रवादी काँग्रेसचे नेते छगन भुजबळ यांनी बुलडाण्यात मोदींवर हल्ला चढवला. आपल्या भाषणात भाजप-सेनेचा खरपूस समाचार घेत सत्ताधाऱ्यांनी एकही आश्वासन पूर्ण केले नसल्याचे ते म्हणाले.
शिवसेना-भाजप सरकारने मला जेव्हा अडीच वर्षे तुरुंगात ठेवलं तेव्हा माझ्यासाठी तुम्ही खूप काही केलं. नवस केले, कोर्ट-कचेऱ्यापर्यंत गेलात, आणखी बरचं काही केलं, हे मी विसरू शकणार नाही, अशी भावना राष्ट्रवादी काँग्रेसचे नेते छगन भुजबळ यांनी बुलडाण्याचे लोकसभेचे उमेदवार राजेंद्र शिंगणे यांच्या जळगाव-जामोद येथील प्रचारसभेत व्यक्त केली. यावेळी व्यासपीठावर खासदार मेमन, गजभिये, रविकांत तुपकर, डॉ. राजेंद्र शिंगणे, ज्योती ढोकणे, रामविजय बुरुंगले, प्रसेनजित पाटील, स्वाती बाकेकर, खालिक बासु विजय अंभोरे, गुलाबराव गावंडे उपस्थित होते.