मोर्णा नदीतील जलकुंभींमुळे परिसरातील नागरिकांना डासांचा त्रास; गंभीर आजाराची भीती

अकोल्यातील मोर्णा नदीमध्ये जलकुंभी वाढल्याने डासांचा प्रादुर्भाव मोठ्या प्रमाणात झाला आहे. याचा नदीकाठच्या नागरिकांना त्रास सहन करावा लागत आहे. या डासांमुळे साथीचे रोगांचे प्रमाण वाढले आहे.

अकोला - पावसाळा ऋतू सुरू असल्याने मोर्णा नदीकाठच्या नागरिकांना डासांचा त्रास वाढला आहे. मोर्णा नदीमध्ये जलकुंभी वाढल्याने डासांचा प्रादुर्भाव मोठ्या प्रमाणात झाला आहे. महापालिकाचा आरोग्य विभाग यावर फॉगिंग मशीनने फवारणी करीत असल्याचा दावा करत आहे. मात्र, परिसरातील नागरिकांनी मनपाच्या या दाव्याला फोल ठरवले आहे. त्यामुळे महापालिका आता तरी नागरिकांच्या आरोग्यासोबत खेळणार नाही, अशी अपेक्षा त्यांच्याकडून व्यक्त केली जात आहे.

संपूर्ण शहरात डासांचे प्रमाण वाढले आहे. या डासांमुळे साथीचे रोग, चिकनगुनिया, डेंग्यू, स्वाईन फ्लू सारखे भयंकर आजार होतात. डासांचा प्रादुर्भाव कमी करण्यासाठी महापालिकेचा आरोग्य विभाग विविध उपाययोजना करत असतो. मात्र, बहुतेक वेळा या उपाययोजना कागदावरच राहतात. प्रत्यक्षात त्या अवलंबल्या जात नाहीत. परिणामी, नदीकाठच्या नागरिकांना विविध आजारांचा सामना करावा लागतो. महापालिकेच्या आरोग्य विभागाने जर योग्य प्रकारे फॉगिंग मशीनची फवारणी केल्यास या आजारांवर नियंत्रण मिळविण्यात यश येऊ शकते. परंतु, महापालिकेचे कर्मचारी साफ-सफाईसाठी तर सोडाच फॅागिंग मशीनच्या फवारणीसाठीही येत नसल्याचा आरोप परिसरातील नागरिक करत आहेत. फॉगिंग मशीन नदीकाठच्या वस्त्यांमध्ये नियमितपणे सायंकाळी फवारणी करत आहे. त्यासाठी येणाऱ्या कर्मचाऱ्यांना संबंधित परिसरातील पाच नागरिकांच्या आणि नगरसेवकांच्या स्वाक्षऱ्या आणणे बंधनकारक आहे. त्यामुळे ही फवारणी होत असल्याचा दावा मनपा आरोग्य विभागाचे अधिकारी डॉ. फारुख शेख करत आहेत.