अहमदनगर झेडपीच्या अध्यक्षपदासाठी महाविकासआघाडी-भाजपमध्ये रस्सीखेच; आज बैठकांचा सिलसिला

अहमदनगर जिल्हा परिषदेची सदस्य संख्या 73 असली तरी सध्या 72 सदस्य आहेत. त्यामुळे सत्ता स्थापनेसाठी 37 हा बहुमताचा आकडा गाठणे महत्त्वाचे आहे. या बहुमतासाठी राजकीय पक्षांकडून जुळवाजुळव सुरू आहे.

अहमदनगर -जिल्हा परिषदेच्या अध्यक्ष व उपाध्यक्षांची निवड येत्या 31 डिसेंबरला होत आहे. त्याअनुषंगाने प्रशासनाने पदाधिकारी निवडीचा कार्यक्रम घोषित केला आहे. या पार्श्वभूमीवर राजकीय पक्षांनी मोर्चेबांधणीची तयारी सुरू केली आहे. शुक्रवारी (27 डिसेंबर) काँग्रेस, राष्ट्रवादी काँग्रेस, शिवसेना, क्रांतिकारी शेतकरी पक्षांच्या बैठकांचा सिलसिला होणार आहेत. विखे, पिचड, नागवडे गटाच्या पक्षांतरामुळे बदलत्या राजकीय परिस्थितीत महाविकास आघाडी आणि भाजपकडून विखे-पिचड गट संख्या जुळवून मिनी मंत्रालयाची पदे आपल्याच ताब्यात कशी राहतील यासाठी प्रयत्नशील असणार आहे. मात्र, काँग्रेसच्या फुटीमुळे पक्षासाठी व्हीप कुणाचा लागू होतो यावर ही निवड अवलंबून आहे.

जिल्हा परिषदेच्या नवीन पदाधिकाऱ्यांची निवड 31 डिसेंबरला दुपारी 3 वाजता होणार आहेत. जिल्हा परिषदेच्या पुढील अडीच वर्षांच्या कार्यकाळासाठी या निवडी होणार आहेत. सध्या काँग्रेस व राष्ट्रवादी काँग्रेस आघाडीची सत्ता आहे. याआधी अडीच वर्षांसाठी अध्यक्षपद काँग्रेसकडे व उपाध्यक्षपद राष्ट्रवादीकडे होते. त्यानंतर आता या पदासाठी राष्ट्रवादी काँग्रेस प्रबळ दावेदार मानली जात आहे. राज्यात महाविकास आघाडीचे सरकार आहे, त्याच पद्धतीने जिल्हा परिषदेतही महाविकास आघाडीचा कित्ता गिरवला जाण्याची शक्यता आहे. विशेष बाब म्हणजे यात नेवासा मतदारसंघाचे आमदार शंकरराव गडाख यांचा क्रांतिकारी शेतकरी पक्ष सहभागी होत असल्याने महाविकास आघाडीचे पारडे जड मानले जात आहे. जिल्हा परिषदेत मागील अडीच वर्षांच्या काळात अध्यक्षपद काँग्रेसकडे होते. त्यामुळे यावेळी अध्यक्षपदासाठी राष्ट्रवादी काँग्रेस प्रबळ दावेदार मानली जात आहे. पक्षाकडून जिल्हा परिषदेच्या विद्यमान उपाध्यक्षा राजश्री घुले यांचे नाव आघाडीवर आहे.

व्हीप महत्वाचा ठरणार -

जिल्हा परिषदेची सदस्य संख्या 73 असली तरी सध्या 72 सदस्य आहेत. त्यामुळे सत्ता स्थापनेसाठी 37 हा बहुमताचा आकडा गाठणे महत्त्वाचे आहे. या बहुमतासाठी राजकीय पक्षांकडून जुळवाजुळव सुरू आहे. सध्या काँग्रेसचे 23, (विखे गट 13, थोरात गट 10 सदस्य असल्याचे मानले जाते), राष्ट्रवादी 19, भाजप 14, शिवसेना 7, क्रांतिकारी शेतकरी पक्ष 5, भाकप 1, महाआघाडी 2, जनशक्ती आघाडी 1, अपक्ष 1 असे पक्षीय बलाबल आहे. कागदावरील या संख्येचा विचार केला तर महाविकास आघाडीला सत्ता मिळवण्यासाठी पुरेसे संख्याबळ दिसत आहे. मात्र, पक्षीय गटनेते काय निर्णय घेतात, व्हीप कोणत्या बाजूने मतदान करा असे बजावतात यावर ते अवलंबून आहे.

थोरात-विखेंची प्रतिष्ठा पणाला -

राज्यात महाविकास आघाडीचा विचार करून जिल्हा परिषदेतही त्यापद्धतीने गणिते मांडली जात आहेत. काँग्रेस 23, राष्ट्रवादी 19, शिवसेना 7 व क्रांतिकारी शेतकरी पक्षाचे 5 असे 54 जणांचे बहुमत सध्या दिसत आहे. असे असले तरी काँग्रेसमधील 13 सदस्य विखे समर्थक आहेत, तर राष्ट्रवादीचे 5 जण पिचड व भाजप समर्थक आहेत. यामुळे विखे कार रणनिती आखतात, यावर चित्र बदलू शकते. मात्र, काँग्रेस पक्षाने थोरतांना राज्यस्तरावरील पक्षाचा प्रमुख चेहरा म्हणून पुढे आणले असल्याने थोरतांना पूर्ण ताकद पणाला लावून महाविकास आघाडीच्या विजयासाठी प्रयत्न करावे लागणार आहेत.