नूर सुल्तान - विश्व कुस्ती चॅम्पियनशीप स्पर्धेत मराठमोळा कुस्तीपटू राहुल आवारे याने ६१ किलो वजनी गटात कांस्य पदक जिंकले. यंदाच्या स्पर्धेत भारताचे हे पाचवे पदक ठरले आहे. दरम्यान, भारताच्या कुस्तीपटूंनी या स्पर्धेत यंदा सर्वोत्तम कामगिरी केली आहे. याआधी २०१३ मध्ये भारतीय कुस्तीपटूंनी या स्पर्धेत ३ पदके जिंकली होती.
हेही वाचा -विश्व कुस्ती चॅम्पियनशिप : दीपक पुनियाला रौप्य, दुखापतीमुळे अंतिम सामन्यातून घेतली माघार
कांस्यपदकसाठी झालेल्या सामन्यात राहुलने अमेरिकेचा प्रतिस्पर्धी टेलर ली ग्राफवर ११-४ ने विजय मिळवला. या सामन्यात राहुलने संपूर्णपणे आपले वर्चस्व राखले होते. सामन्याच्या सुरुवातीला अमेरिकन प्रतिस्पर्ध्याने राहुलच्या दोन्ही पायांवर हल्ला करत आक्रमक सुरुवात केली आणि पहिल्याच दणक्यात २ गुण मिळवले. मात्र राहुलने आपले लक्ष विचलीत न होऊ देता, दमदार पुनरागमन केले आणि पुढच्या काही मिनीटांमध्ये ४-२ अशी आघाडी घेतली.