अम्मान (जॉर्डन) - भारताचा पुरुष बॉक्सिंगपटू अमित पांघल पाठोपाठ सहा वेळा विश्वविजेती, भारताची महिला बॉक्सिंगपटू एमसी मेरी कोम टोकियो ऑलिम्पिकसाठी पात्र ठरली आहे. तिने आज (सोमवार) आशियाई ऑलिम्पिक पात्रता बॉक्सिंग स्पर्धेत फिलिपाइन्सच्या इरिश मॅग्नोचा पराभव करत ऑलिम्पिकचे तिकिट पक्के केले. ती ५१ किलो वजनी गटात भारतासाठी ऑलिम्पिक खेळेल.
आशियाई ऑलिम्पिक पात्रता बॉक्सिंग स्पर्धेत मेरी कोमने उपांत्यपूर्व सामन्यात मॅग्नोशीचा पराभव केला. तिने ही लढत ५-० ने जिंकली. या विजयासह ती ऑलिम्पिकसाठी पात्र ठरली.
दरम्यान, ३७ वर्षीय मेरी कोमने न्यूझीलंडच्या टॅमिन बेन्नीचा ५-० असा धुव्वा उडवत उपांत्यपूर्व फेरी गाठली होती. या विजयानंतर तिने सुरुवातीपासूनच मी आक्रमकतेची आखलेली रणनिती फलदायी ठरली. माझ्या कामगिरीबाबत मी समाधानी आहे, अशी प्रतिक्रिया दिली होती.