मुंबई: रविवारी (10एप्रिल) आयपीएलच्या पंधराव्या हंगामातील एकोणीसावा सामना मुंबईतील ब्रेबॉर्न स्टेडियम खेळला गेला. या सामन्यात दिल्ली कॅपिटल्स विरुद्ध कोलकाता नाइट रायडर्स ( Delhi Capitals vs Kolkata Knight Riders ) आमनेसामने आले होते. हा सामना दिल्ली संघाने कोलकातावर 44 धावांनी ( Delhi Capitals won by 44 runs ) मात करत जिंकला. या सामन्यात प्रथम फलंदाजी करताना, दिल्लीने कोलकात्याला 216 धावांचे लक्ष्य दिले होते. प्रत्युत्तरात कोलकात्याचा संघ सर्वबाद 171 धावाच करु शकला.
पृथ्वी शॉ आणि डेव्हिड वॉर्नरने ( David Warner ) दिल्ली कॅपिटल्सला दमदार सुरुवात करून दिली. दोघांनी पुन्हा एकदा अर्धशतकी भागीदारी केली आणि पॉवरप्लेमध्ये दिल्लीची धावसंख्या 68-0 अशी झाली. शॉने सलग दुसऱ्या सामन्यात अर्धशतक झळकावले. तो 29 चेंडूंत 7 चौकार आणि 2 षटकारांच्या मदतीने 51 धावा करून बाद झाला. येथून ऋषभ पंतने (13 चेंडूत 27 धावा) धावांचा वेग कमी होऊ दिला नाही आणि त्याने वॉर्नरसह संघाची धावसंख्या 150 च्या जवळ नेली. त्यानंतर पंत 148 धावांवर बाद झाला.
येथून दिल्ली कॅपिटल्सची ( Delhi Capitals ) फलंदाजी ढासळली आणि त्यांची मधली फळी फ्लॉप ठरली झाली. ललित यादव आणि रोवमन पॉवेल फार काही करू शकले नाहीत. वॉर्नरही 17व्या षटकात 166 सांघिक धावसंख्येवर बाद झाला. वॉर्नरने 45 चेंडूत 6 चौकार आणि 2 षटकारांच्या मदतीने 61 धावा केल्या. दिल्ली कॅपिटल्सला एकवेळ 200 धावांचा टप्पा पार करणे कठीण वाटत होते, पण शार्दुल ठाकूर (11 चेंडूत 29* धावा, एक चौकार आणि 3 षटकार) आणि अक्षर पटेल (14 चेंडूत 22* धावा) यांनी वेगवान खेळ करत धावसंख्या दोनशेच्या पार पोहचवली. दिल्लीने शेवटच्या 5 षटकात 54 धावा केल्या. तसेच कोलकाता नाईट रायडर्सकडून सुनील नरेनने 2, आंद्रे रसेल, उमेश यादव आणि वरुण चक्रवर्ती यांनी प्रत्येकी एक विकेट घेतली.