सिंगापूर- येथे सुरू असलेल्या तिरंगी मालिकेत नेपाळ क्रिकेट संघाचा कर्णधार पारस खडकाने शनिवारी इतिहास घडवला. सिंगापूरविरुध्दच्या टी-२० लढतीत पारसने नाबाद शतकी खेळी केली. पारसच्या या खेळीच्या जोरावर नेपाळने हा सामना ९ गडी राखून जिंकला. महत्वाची गोष्ट म्हणजे, टी-२० क्रिकेटमध्ये धावांचा पाठलाग करताना शतकी खेळी करण्याचा मान पारसच्या नावे जमा झाला आहे. आतापर्यंत कोणत्याही कर्णधाराला अशी कामगिरी करता आलेली नाही.
धावांचा पाठलाग करुन विजय मिळवण्यात विराट अव्वल समजला जातो. त्याने अनेक सामने एकहाती जिंकून दिले आहेत. मात्र, विराटलाही धावांचा पाठलाग करताना टी-२० सामन्यात शतक ठोकता आलेले नाही. पारस या विक्रमासह नेपाळकडून टी-२० क्रिकेटमध्ये शतक ठोकणारा पहिला खेळाडू ठरला आहे. सिंगापूर विरुध्दच्या सामन्यात पारसने ५२ चेंडूत नाबाद १०६ धावा तडकावल्या. त्याने या खेळीत ७ चौकार आणि ९ गंगनचुंबी षटकार ठोकले.