मुंबई - इंग्लंड क्रिकेट संघाचा माजी कर्णधार मायकल वॉनने भारत-इंग्लंड यांच्यातील एकदिवसीय मालिकेबाबत भविष्यवाणी केली आहे. उभय संघातील मालिका भारत ३-० ने जिंकेल, असे वॉन याने म्हटलं आहे.
भारताविरूद्धच्या मालिकेसाठी, इंग्लंड संघात वेगवान गोलंदाज जोफ्रा आर्चर आणि जो रुट नाहीत. यामुळे इंग्लंडचा पराभव होईल, असे भाकित वॉन याने वर्तवले आहे.
मायकल वॉन याने या संदर्भात एक ट्विट केले आहे. एकदिवसीय मालिकेआधी भविष्यवाणी... भारतीय संघ ३-० ने विजयी होईल.... कारण रुट आणि आर्चर नाहीत, अशा आशयाचे ट्विट त्याने केले आहे.
दरम्यान, जोफ्रा आर्चरला दुखापत झाली आहे. यामुळे त्याचा समावेश इंग्लंड संघात करण्यात आलेला नाही. तो उपचारासाठी इंग्लंडला परतला आहे. दुसरीकडे जो रुटला इंग्लंड संघात स्थान देण्यात आलेले नाही.
इंग्लंड संघाने भारतीय दौऱ्याची सुरूवात कसोटी मालिकेने केली. यात त्यांचा ३-१ ने पराभव झाला. यानंतर उभय संघात टी-२० मालिका पार पडली. भारताने या मालिकेत ३-२ ने विजय मिळवला. आता उभय संघात एकदिवसीय मालिका होत असून यात देखील भारतीय संघ विजय मिळवेल, असे वॉनने म्हटलं आहे.