बंगळुरू - प्रसिद्ध माजी क्रिकेटपटू व उत्तर प्रदेश सरकारमधील कॅबिनेट मंत्री चेतन चौहान यांचे काही दिवसांपूर्वीच निधन झाले. आता भारताने अजून एक महान क्रिकेटपटू गमावला आहे. माजी क्रिकेटपटू गोपालस्वामी कस्तुरीरंगन यांचे आज बुधवारी बंगळुरूतील निवासस्थानी निधन झाले. ते ८९ वर्षांचे होते. कस्तुरीरंगन यांचे चामराजापेट येथील त्यांच्या निवासस्थानी हृदयविकाराच्या झटक्याने निधन झाले, असे कर्नाटक राज्य क्रिकेट असोसिएशनचे (केएससीए) कोषाध्यक्ष आणि प्रवक्ते विनय मृत्युंजय यांनी पीटीआयला सांगितले.
माजी क्रिकेटपटू, प्रशासक आणि बीसीसीआयचे क्युरेटर म्हणून कस्तुरीरंगन यांची ओळख होती. उजव्या हाताचे वेगवान गोलंदाज अशी ओळख असलेले कस्तुरीरंगन हे १९४८ ते १९६३ दरम्यान रणजी करंडक स्पर्धेत म्हैसूरकडून खेळले. त्यांन म्हैसूरकडून ३६ प्रथम श्रेणी सामन्यांमध्ये ९४ बळी मिळवले. १९५२मध्ये भारतीय संघात वेस्ट इंडीज दौर्‍यासाठी त्यांना निवडण्यात आले होते, पण त्यांनी या दौऱ्याला नकार दिला.