मुंबई - भारतीय क्रिकेट नियामक मंडळाने वेगवान गोलंदाज भुवनेश्वर कुमार आणि युवा फलंदाज पृथ्वी शॉ यांच्या तंदुरुस्तीविषयीचे अपडेट दिले आहेत. आज (गुरुवार) बीसीसीआयने आपल्या अधिकृत ट्विटर अकाऊंटवरून म्हटले आहे की, ११ जानेवारीला लंडनमध्ये भुवीवर हर्नियाचे ऑपरेशन झाले. त्याचबरोबर शॉ आता पूर्णपणे तंदुरुस्त असून तो भारताच्या 'अ' संघात सामील होण्यासाठी न्यूझीलंडला रवाना झाला आहे.
भुवनेश्वर कुमार याला वेस्ट इंडीजविरुद्धच्या मालिकेदरम्यान दुखापत झाली होती, तर पृथ्वी शॉला रणजी करंडकातील कर्नाटक विरुद्धच्या सामन्यात खांद्याला दुखापत झाली होती.
पृथ्वीचे निवड न्यूझीलंड दौऱ्यासाठी भारतीय 'अ' संघात करण्यात आली. त्यानंतर त्याला दुखापत झाली. यामुळे तो न्यूझीलंड दौऱ्यातील दोन सराव सामने खेळणार की नाही, याबाबत सशांकता व्यक्त केली जात होती. तेव्हा बीसीसीआयने शॉ तंदुरुस्त झाला असून न्यूझीलंडमध्ये होणाऱ्या भारत 'अ' संघासाठी रवाना झाला असल्याचे स्पष्ट केले आहे.