हैदराबाद -विराट कोहलीच्या धामाकेदार ९४ धावांच्या खेळीच्या जोरावर भारताने विंडीजला पहिल्या टी-२० सामन्यात मात दिली. हा सामना भारताने ६ गडी आणि ८ चेंडू राखून जिंकला. या सामन्यात विराटने विंडीजच्या गोलंदाजांचा खरपूस समाचार घेत ६ चौकार आणि ६ उत्तुंग षटकार ठोकले. त्याच्या या खेळीमुळे बॉलिवूडचे महानायक अमिताभ बच्चन यांनाही विंडीजच्या गोलंदाजांची दया आली.
हेही वाचा -'या' विक्रमात हिटमॅनपेक्षा विराटच भारी...तुम्हीच पाहा काय सांगते आकडेवारी
हैदराबादमध्ये पार पडलेल्या सामन्यादरम्यान बिग बींनी एक ट्विट केले. 'यार कितीवेळा सांगितलं की, विराटला छेडू नका, छेडू नका, छेडू नका.. पण तुम्ही ऐकता का?...आता दिलं ना लिहून हातात...बघ बघ वेस्ट इंडिजचे तोंड बघ... किती मारलं त्याला... किती मारलं', असं गमतीशीर ट्विट बच्चन यांनी केले आहे.
या विजयासह भारताने तीन सामन्यांच्या मालिकेत १-० ने आघाडी घेतली आहे. विंडीजने भारतासमोर ५ बाद २०७ धावांचा डोंगर उभा केला होता. या आव्हानाचा पाठलाग करताना विराट कोहली आणि लोकेश राहुलने केलेल्या तुफान फटकेबाजीने विजय साजरा केला.