अबुधाबीत रंगणार अजून एक क्रिकेट लीग

अबुधाबी टी-१० लीग पुढील वर्षी २८ जानेवारी ते ६ फेब्रुवारी दरम्यान खेळवली जाणार आहे. ही स्पर्धा अबुधाबीच्या शेख झायेद स्टेडियमवर खेळवण्यात येईल.

अबुधाबी - अबुधाबी टी-१० लीगचा चौथा हंगाम पुढील वर्षी २८ जानेवारी ते ६ फेब्रुवारी दरम्यान शेख झायेद स्टेडियमवर खेळला जाणार आहे. या स्पर्धेत आठ संघ भाग घेतील. "२०१७मध्ये शारजाह क्रिकेट स्टेडियममध्ये या स्पर्धेची सुरुवात झाल्यापासून टी-१० लीग सर्वात वेगवान स्वीकारलेली आणि सुप्रसिद्ध क्रिकेट स्पर्धा बनली आहे", असे टी-१० स्पोर्ट्स मॅनेजमेंटचे संस्थापक आणि अध्यक्ष शाजी एल. मुल्क यांनी सांगितले.

दरम्यान, टी-१० स्पोर्ट्स मॅनेजमेन्टने आयसीसीचे माजी सीईओ आरोन लोगट यांची नीती व विकास संचालक म्हणून नियुक्ती केली आहे. लोगट आता टी-१० क्रिकेटच्या विकासासाठी सल्ला देतील. लोगोट २००८ ते २०१२पर्यंत आयसीसीचे मुख्य कार्यकारी अधिकारी होते. यंदाची आयपीएल स्पर्धाही अबुधाबीव्यतिरिक्त दुबई आणि शारजाह येथे खेळवली जात आहे.