सध्या मनोरंजनसृष्टी रुळावर येताना दिसतेय. निरनिराळ्या वाहिन्यांवर नवनवीन वाहिन्या सुरु होताना दिसताहेत. झी मराठी या वाहिनीवरील मालिकांना नेहमीच आवडीने पाहिले जाते, त्यातच नवीन मालिका असेल तर प्रेक्षकांमध्ये उत्सुकता वाढलेली असते. झी मराठीवरील 'देवमाणूस' या मालिकेने आपल्या वेगळ्या कथानकामुळे लोकप्रियतेचं शिखर गाठलं. मालिकेच्या कथानकाने प्रेक्षकांना खिळवून ठेवलं आणि प्रेक्षकांनी या मालिकेला पसंती दर्शवली. पण आता ही मालिका लवकरच प्रेक्षकांचा निरोप घेणार आहे. त्याजागी आता झी मराठीवर एक नवीन मालिका येऊ घातलीय 'ती परत आलीये' नावाची.
नवीन मालिका 'ती परत आलीये’ एक गूढ रहस्यमय मालिका असून या मालिकेचं लेखन 'देवमाणूस' या लोकप्रिय मालिकेचे लेखक स्वप्नील गांगुर्डे यांनीच केलं आहे. त्यामुळे ही मालिका देखील प्रेक्षकांना खिळवून ठेवणार यात शंकाच नाही. नुकताच या मालिकेचा प्रोमो रिलीज झालाय. जेष्ठ अभिनेते विजय कदम या मालिकेत एका वेगळ्या आणि लक्षवेधी भूमिकेत दिसणार आहेत. विजय कदम हे बऱ्याच कालावधी नंतर टीव्हीवर पुनरागमन करणार आहेत. प्रोमोमध्ये प्रेक्षकांनी पाहिलं की विजय कदम एका परिसरात गस्त घालत आहेत आणि त्या परिसरामध्ये हत्या होते त्यामुळे सावध राहा अशी चेतावनी देताना दिसत आहेत. नक्की ही भानगड काय आहे आणि या मालिकेत अजून कोण कोण कलाकार असणार आहेत ही सर्व माहिती अजूनही गुलदस्त्यात आहे.