स्टार प्रवाहवरील ‘अबोली’ ची गोष्ट आहे अबोली नावाच्या मुलीच्या संघर्षाची. प्रेक्षकांच्या प्रेमामुळे मालिकेने नुकताच १०० भागांचा टप्पा पूर्ण केला आहे. मालिकेचा यापुढील प्रवासही तितकाच उत्कंठावर्धक आणि मनोरंजनाने परिपूर्ण असेल. अभिनेत्री गौरी कुलकर्णी अबोली ही व्यक्तिरेखा साकारत असून तिच्यासोबत सचित पाटील, प्रतिक्षा लोणकर, मौसमी तोंडवळकर, शर्मिष्ठा राऊत, संदेश जाधव, अपर्णा अपराजित, अंगद म्हस्कर, दीप्ती लेले अशी दमदार कलाकारांची फौज आहे. आता या मालिकेत अजून एक दमदार एंट्री होतेय, सुप्रसिद्ध अभिनेते उदय टिकेकर यांची.
मालिकेत सध्या अबोलीच्या आयुष्यात बरीच उलथापालथ सुरू आहे. प्रतापरावांकडून झालेल्या अपमानानंतर अंकुशने अबोलीला घरच्या बाहेरचा रस्ता दाखवला आहे. राहायला कुठेच आसरा नसल्यामुळे अबोलीने मंदिरात राहण्याचं ठरवलं आहे. अशातच मालिकेत डीसीपी किरण कुलकर्णी यांची एन्ट्री होणार आहे. अबोलीला पुन्हा अंकुशच्या घरात प्रवेश मिळावा यासाठी किरण कुलकर्णी प्रयत्न करतील का हे मालिकेच्या पुढील भागांतून समजेल.