मुंबई- गेल्या दोनेक वर्षांपासून आलेली मरगळ चित्रपटसृष्टीने झटकून टाकली आहे. सिनेदरबारी अनेक नवीन चित्रपट रुजू होताहेत. त्यातीलच एक म्हणजे बहुप्रतीक्षित ‘चंद्रमुखी’. तर ही चंद्रमुखी कोण हे जाणून घेण्याची उत्सुकता सर्वांना लागून राहिली होती. चंद्रमुखीच्या चेहऱ्यावरून पडदा हटला असून चंद्रमुखीच्या भूमिकेत अमृता खानविलकर दिसणार आहे. चंद्रमुखी' चे मुखावलोकन झाले मुंबईच्या आयकॉनिक ऐतिहासिक थिएटरमध्ये. ऑपेरा हाऊस मध्ये मोठ्या जल्लोषात चंद्रमुखी च्या ३० फूटी फोटोचे अनावरण करण्यात आले.
ऑपेरा हाऊस ‘चंद्रमुखी’ सारखे व ‘चंद्रमुखी’ साठी नटले होते. प्रवेश करताच रोषणाईने झगमगलेले भव्य मैदान, सर्वत्र रंगीबेरंगी पताके, बाजूला तिकीटबारी, समोर सजलेला तमाशाचा फड, गजरा आणि अत्तराचा दरवळणारा सुवास, फेटा बांधलेला रसिक समुदाय, तोंडात विडा, ढोलकीचा ताल, घुंगरांची साथ, बहारदार लावणी, रसिकांच्या टाळ्या, शिट्ट्यांचा गजर यातून भूतकाळातील लावणी चा फडच जणू अनुभवायला मिळाला. ऑपेरा हाऊस मध्ये प्रामुख्याने इंग्रजी, हिंदी आणि प्रादेशिक भाषांचे कार्यक्रम होतात तिथे प्रथमच ढोलकीची थाप पडली आणि घुंगरांचा नाद घुमला तसेच 'चंद्रा' हे शीर्षक गीतही सादर करण्यात आले. या गाण्याला श्रेया घोषाल हिने स्वरबध्द केले असून गाण्याचे बोल गुरू ठाकूर यांचे आहेत. तर या गाण्याला अजय-अतुल यांचे संगीत लाभले आहे. डोळे दिपवून टाकणाऱ्या या भव्य सोहळ्यात ३० फूटी 'चंद्रा'च्या फोटोचे अनावरण लाल दिव्याच्या गाडीमधून आलेल्या रूबाबदार अशा दौलत देशमाने म्हणजेच आदिनाथ कोठारे याने केले. या वेळी चंद्राने आपल्या बहारदार लावणीने उपस्थितांची मने जिंकली.
चंद्रमुखीच्या भूमिकेत अमृता खानविलकर आपल्या भूमिकेबद्दल अमृता खानविलकर म्हणाली, ''आजवर साकारलेल्या भूमिकांपेक्षा सर्वात वेगळी आणि ताकदीची भूमिका मी ‘चंद्रमुखी’मध्ये साकारत आहे. चंद्रा ही एक लावणी कलावंत असून लावणी कलावंतांचे जीवन ती प्रेक्षकांसमोर आणणार आहे. मला खूप आनंद आहे की, अशा प्रकारची भूमिका साकारण्याची संधी मला मिळाली आहे. अनेक दिवसांपासूनच्या 'चंद्रमुखी'च्या उत्सुकतेला पूर्णविराम मिळाला आहे. जी उत्सुकता तुम्हाला होती, तशीच उत्सुकता आता मला चित्रपट झळकण्याची आहे. हा चित्रपट आम्ही या लोककलावंताना समर्पित करत आहोत. या निमित्ताने त्यांना व्यासपीठ मिळवून देण्याचा आमचा एक छोटासा प्रयत्न असून या भव्य चित्रपटाचा अनुभव प्रेक्षकांनी चित्रपटगृहातच घ्यावा.'’
चंद्रमुखी मुखावलोकन सोहळा तर 'प्लॅनेट मराठी'चे संस्थापक, प्रमुख अक्षय बर्दापूरकर म्हणाले, ''इतक्या महिन्यांपासून प्रेक्षकांनी जी उत्सुकता ताणून ठेवली होती, त्या 'चंद्रमुखी'चा चेहरा अतिशय थाटात प्रेक्षकांसमोर आला आहे. हा एक भव्यदिव्य चित्रपट असून राजकारणाभोवती फिरणारी एक आगळीवेगळी प्रेमकहाणी यात पाहायला मिळणार आहे. हा सोहळा ब्रिटिश कालीन ऑपेरा हाऊसमध्ये करण्यामागचा मुख्य उद्देश म्हणजे या ठिकाणाला ऐतिहासिक महत्व आहे आणि लावणी ही आपल्या महाराष्ट्राच्या लोकसंस्कृतीचा एक वैशिष्ट्यपूर्ण भाग आहे. त्यामुळे जिथे इंग्रजी आणि हिंदी भाषांना प्रतिष्ठेचे स्थान दिले जाते, तिथे आपली अभिजात परंपरा सादर व्हावी, हा आमचा अट्टाहास होता. या निमित्ताने या लोककलावंतांना एक व्यासपीठही मिळाले.''
हेही वाचा -निळ्या पँट सूटमध्ये सोनम कपूरचा प्रेग्नन्सी ग्लो पाहा फोटो
चित्रपटाचे दिग्दर्शक प्रसाद ओक म्हणाला, '''चंद्रमुखी'चा चेहरा प्रेक्षकांसमोर कधी येणार, याची आम्ही सुद्धा आतुरतेने वाट पाहात होतो. मात्र यासाठी आम्ही योग्य वेळेच्या शोधात होतो आणि अखेर ती योग्य वेळ आली आहे. चंद्रा ही अशी लावण्यवती आहे, जिच्या सौंदर्याने कोणीही घायाळ होईल. आपल्या सौंदर्याने, अदांनी समोरच्याला मोहात पाडणारी 'चंद्रा' लढवय्यी आहे. तिच्या या लढ्याला यश मिळते का, हे 'चंद्रमुखी' पाहिल्यावरच कळेल.'' संगीतकार अजय -अतुल म्हणाले, ''हा एक भव्य चित्रपट असल्याने त्याच्या गाण्यांची भव्यताही तितक्याच ताकदीची हवी होती. चंद्रासारख्या सौंदर्यवतीला साजेशी अशी गाणी या चित्रपटात आवश्यक असल्याने यासाठी आम्ही बरीच मेहनत घेतली. यात आम्हाला दिग्दर्शक प्रसाद ओक यांच्यासह चित्रपटाच्या टीमची बरीच मदत झाली. लावणी म्हणजे गीत, नृत्य आणि अदाकारी यांचा त्रिवेणी संगम. त्यामुळे आमच्या या गाण्यांना अमृताने तिच्या नृत्याच्या अदाकारीने चारचाँद लावले आहेत.''
चंद्रमुखी मुखावलोकन सोहळा गोल्डन रेशो फिल्म्सचे सीओओ पियुष सिंग म्हणाले, ''’चंद्रमुखी' आम्हाला चित्रपटगृहातच प्रदर्शित करायचा होता म्हणूनच आम्ही इतकी प्रतीक्षा केली. आता शंभर टक्के आसनक्षमतेला परवानगी असल्याने या चित्रपटाचा आनंद प्रेक्षकांनी सिनेमागृहातच घ्यावा. चित्रपटाची टीम आणि अजय -अतुलची अफलातून गाणी या दोन्ही गोष्टी एकत्र आल्याने एक उत्तम योग जुळून आला आहे.''विश्वास पाटील यांच्या 'चंद्रमुखी' कादंबरीवर आधारित, अक्षय बर्दापूरकर, प्लॅनेट मराठी आणि गोल्डन रेशो फिल्म्स निर्मित, क्रिएटिव्ह वाईब प्रॉडक्शन प्रस्तुत फ्लाइंग ड्रॅगन एंटरटेनमेंट, लाइटविदिन एंटरटेनमेंट सहप्रस्तुत या चित्रपटाचे दिग्दर्शन प्रसाद ओक यांनी केले असून पटकथा, संवाद चिन्मय मांडलेकर यांचे आहेत. या चित्रपटाच्या छायाचित्रणाची धुरा संजय मेमाणे यांनी सांभाळली आहे. 'नटरंग'नंतर बऱ्याच काळानंतर अजय -अतुल यांचे दमदार संगीत प्रेक्षकांना ऐकायला मिळणार आहे 'चंद्रमुखी' तून जी येत्या २९ एप्रिल रोजी प्रेक्षकांच्या भेटीला येणार आहे.
हेही वाचा -राधिका मदनने सुरू केले 'सना'चे शुटिंग