मुंबई -बॉलिवूडवर सध्या अक्षय कुमारचीच जादू पाहायला मिळत आहे. त्याचे एकापाठोपाठ एक चित्रपट बॉक्स ऑफिसवर हिट ठरत आहेत. यावर्षी त्याच्या 'केसरी' आणि 'मिशन मंगल' या दोन्हीही चित्रपटांनी १०० कोटीपेक्षा जास्त कमाई केली आहे. तर, दिवाळीतही त्याचा 'हाऊसफूल ४' चित्रपट प्रदर्शनासाठी सज्ज झाला आहे. या चित्रपटानंतरही बऱ्याच चित्रपटांमध्ये अक्षयची वर्णी लागली आहे. आगामी 'लक्ष्मी बाँब' या चित्रपटात तो किन्नराच्या भूमिकेत झळकणार आहे. काही वेळापूर्वीच या चित्रपटातील त्याचा दमदार लूक प्रदर्शित करण्यात आला आहे.
अक्षय कुमार या फोटोमध्ये साडी घातलेला दिसतो. गळ्यात ताविज, कपाळावर लालभडक कुंकू, चेहऱ्यावर करारी लूक असलेला हा फोटो आहे. सोशल मीडियावर त्याच्या या लूकवर नेटकऱ्यांच्याही प्रतिक्रिया येत आहेत.
अक्षय कुमारने हा फोटो शेअर करुन सर्वांना नवरात्रीच्या शुभेच्छा दिल्या आहे. या भूमिकेबाबत आनंदी आणि नव्हर्स असल्याचे त्याने या पोस्टमध्ये म्हटले आहे. पण, आपलं आयुष्य हे आपल्या कंम्फर्ट झोनबाहेर असतं, असेही त्याने लिहिलं आहे.