मुंबई - Tiger 3: बॉलिवूड अभिनेता सलमान खानच्या आगामी 'टायगर-3'ची चाहते आतुरतेने वाट पाहत आहेत. हा चित्रपट अंदाजे 300 कोटींच्या बजेटमध्ये बनलेला आहे. 'टायगर-3' चित्रपट 10 नोव्हेंबरला थिएटरमध्ये प्रदर्शित होणार आहे. प्रेक्षक बऱ्याच दिवसांपासून चित्रपटाच्या ट्रेलरची वाट पाहत आहेत आणि आता ही प्रतीक्षा संपणार आहे, मिळालेल्या माहितीनुसार 'टायगर-3'च्या ट्रेलर बाबात एक संदेश 27 सप्टेंबरला रिलीज होणार आहे. हा यशराज फिल्म्स स्पाय युनिव्हर्सचा पाचवा चित्रपट आहे. 'एक था टायगर', 'टायगर जिंदा है', 'वॉर' आणि 'पठाण' हे चित्रपट रूपेरी पडद्यावर खूप लोकप्रिय झाले आहेत.
'टायगर-3' चित्रपटाचा टिझर होणार रिलीज : 'टायगर-3' या चित्रपटात सलमान खान आणि कतरिना कैफची जोडी पुन्हा एकदा प्रेक्षकांचे मनोरंजन करणार आहे. तसेच प्रेक्षकांना ट्रेलर व्हिडिओच्या माध्यमातून पहिल्यांदाच 'टायगर-3'ची झलक पाहायला मिळणार आहे. 'टायगर-3'च्या चित्रपटाचे काही पोस्टर्स यापूर्वी प्रदर्शित झाले होते. 'टायगर-3' चित्रपटामधील पोस्टर्स चाहत्यांना खूप आवडले होते. याशिवाय चित्रपटाचे प्रमोशन हे ट्रेलरद्वारे करण्यात येणार आहे. 'एक था टायगर' आणि 'टायगर जिंदा है' नंतर 'टायगर 3' हा सलमानचा तिसरा स्पाय थ्रिलर चित्रपट असेल. या चित्रपटात सलमान आणि कतरिना सहा वर्षांच्या दीर्घ कालावधीनंतर टायगर आणि झोयाच्या भूमिकेत परतत आहेत. या चित्रपटात इमरान हाश्मी खलनायकाच्या भूमिकेत दिसणार आहे. 'टायगर-3'च्या दिग्दर्शनाची जबाबदारी मनीष शर्मा यांनी घेतली आहे.