डोंबिवलीत स्वाईन फ्लूमुळे दोन वर्षांच्या चिमुकलीचा मृत्यू

मृत बेबी साहिल तापाने आजारी असल्यामुळे तिच्यावर उपचार सुरु होते. उपचार सुरु असताना तिचे निधन झाले. कल्याण-डोंबिवली महापालिका क्षेत्रात विविध साथीच्या आजारांनी नागरिक त्रस्त आहेत.

ठाणे- डोंबिवलीतील पश्चिम परिसरात राहणाऱ्या दोन वर्षाच्या बालिकेचे स्वाइन फ्लूने निधन झाले आहे. बेबी पियुषा साहिल असे निधन झालेल्या बालिकेचे नाव आहे. साईन फ्लू आजाराने गेलेला हा पहिला बळी असल्याचे बोलले जातेय.

कल्याण-डोंबिवली महापालिका क्षेत्रात विविध साथीच्या आजारांनी नागरिक त्रस्त आहेत. यापूर्वीही डेंगू आणि मेंदूज्वर या आजाराने दोन बालकांसह एक तरुणाचा मृत्यू झाला आहे. यामुळे पालिका प्रशासनाने गंभीरतेने साथ रोगावर तातडीने प्रतिबंधक उपाययोजना कराव्या, अशी मागणी आता जोर धरू लागली आहे.

मृत बेबी ही डोंबिवली पश्चिम परिसरातील राजू नगर भागातील साईलीला चाळीत राहते. गेले काही दिवस बेबी तापाने फणफणली होती. तिच्यावर उपचार सुरू असताना तिचे निधन झाले. कल्याण-डोंबिवली महापालिकेचे वैद्यकीय अधिकारी डॉक्टर राजू लवंगारे यांना विचारले असता त्यांनीही याला दुजोरा दिला आहे. तसेच या भागात सर्वेक्षण करण्यात आले असून मृत बेबीच्या मोठ्या बहिणीला फ्लाईंग फ्लू प्रतिबंधक औषधाचा डोस दिला असल्याचे त्यांनी सांगितले.