येवला(नाशिक) : याला जेलमध्ये टाक, त्याला जेलमध्ये टाक असे केल्यापेक्षा चांगली तुम्ही चांगली कामे करा असा टोला अन्न व नागरी पुरवठा मंत्री छगन भुजबळ यांनी भाजपला लगावला आहे. तसेच एखाद्या कार्यक्रमाला किंवा हॉटेलला सरकारने परवानगी दिली म्हणजे तिथे बाकीचे धंदे करा असे सरकार सांगत नाही असेही ते म्हणाले. नाशिकच्या येवला येथे कोरोना आढावा बैठकीनंतर ते पत्रकारांशी बोलत होते.
मग मुंद्रा बंदराला का परवानगी दिली?
क्रुझ पार्टीला राज्य सरकारने परवानगी दिल्याच्या मुद्द्यावरून पत्रकारांनी प्रश्न विचारला असता, या पार्टीला कुणी परवानगी दिली हे मला माहिती नाही. मात्र राज्य सरकार हॉटेलला किंवा लॉन्सला परवानगी देते म्हणजे या ठिकाणी बाकीचे धंदे करा असं काही राज्य सरकार सांगत नाही. यात सरकार कसं काय दोषी असू शकतं? असे असेल तर मुंद्रा बंदरावर एवढ्या मोठ्या प्रमाणात अमली पदार्थ सापडले तर त्या बंदराला केंद्र सरकारने का परवानगी दिली असा प्रश्न विचारला पाहिजे असेही भुजबळ म्हणाले.