काँग्रेस कार्यकर्त्यांची नार्को टेस्ट केल्यास, कित्येकजण भाजपमध्ये येण्यास उत्सुक असतील - मुनगंटीवार

आम्ही दरवाजे खुले केले तर काँग्रेसच्या कार्यालयात कार्यकर्तेही शिल्लक राहणार नाहीत, असा टोला अर्थमंत्री सुधीर मुनगंटीवार यांनी काँग्रेसला लगावला.

मुंबई - मतदानोत्तर चाचणीत भाजपला यश मिळत असल्याचे लक्षात येताच भाजप कार्यकर्त्यांसह नेतेही जल्लोषात आहेत. काँग्रेस कार्यकर्त्यांची नार्को टेस्ट केल्यास कित्येक कार्यकर्तेही भाजपमध्ये येण्याच्या तयारीत असतील, असे ज्येष्ठ नेते आणि अर्थमंत्री सुधीर मुनगंटीवार यांनी म्हटले आहे. वसंत स्मृत्ती या भाजप कार्यालयात ते बोलत होते. काँग्रेस नेते राधाकृष्ण विखे पाटील आणि राष्ट्रवादीचे नेते विजय सिंह मोहिते पाटील यांच्यानंतर कोण? अशी विचारणा पत्रकारांनी करताच त्यांनी ही प्रतिक्रिया दिली.

विरोधकांना आता बोलायला काहीच शिल्लक नसल्याने ते ईव्हीएम बाबत प्रश्नचिन्ह उपस्थित करत आहेत. विरोधी पक्षात असलेले कार्यकर्तेही काँग्रेस आणि राष्ट्रवादीला कंटाळले आहेत. लोकसभेत भाजपला घवघवीत यश मिळणारच आहे. पण आणखी अभ्यास करून भाजपचा पदाधिकारी मैदानात उतरून विधानसभेतही काँग्रेस-राष्ट्रवादीला चारीमुंड्या चित करणार असल्याचे मुनगंटीवार यांनी सांगितले. तसेच राष्ट्रवादीचे नेते शरद पवार यांच्या पायाखालची वाळू घसरत असल्यानेच ते मोदी यांच्यावर खालच्या स्तरावर टीका करत असल्याचे ते म्हणाले.

जे पंतप्रधान देवाचे केवळ दर्शन घेत नाही तर तिथल्या (केदारनाथ) सर्व समस्यांचे निराकरण करतात, त्यांना नौटंकी म्हणणे ही विरोधकांची दिवाळखोरी आहे, असेही मुंगणटीवार यांनी सांगितले. आम्ही दरवाजे खुले केले तर काँग्रेसच्या कार्यालयात कार्यकर्तेही शिल्लक राहणार नाहीत असा टोलाही त्यांनी यावेळी लगावला. निकालाच्या दिवशी कार्यकर्ते अधिक जल्लोषात विजय साजरा करतील. एनडीएची निकलापूर्वीची बैठक ही आनंद वाढवण्यासाठी आहे तर युपीएची बैठक दुःख वाटून घेण्यासाठी आहे, अशी कोपरखळीही त्यांनी विरोधकांना मारली.