माटुंगा रेल्वेस्थानकावर युवतीचा विनयभंग; चुंबन घेतल्याचा प्रकार सीसीटीव्हीत कैद

जीआरपी पोलिसांनी रेल्वे हद्दीत लोकल ट्रेन मध्ये पाकिटमारी करणाऱ्या आरोपींच्या विरोधात मोहीम सुरू केली होती. यामध्ये पोलिसांनी पाकीटमारीच्या गुन्ह्यात राजीजूर हबीब्युर खान या आरोपीला अटक केली होती. आता याच आरोपीने पीडित युवतीचा विनयभंग केल्याचे स्पष्ट झाले आहे.

मुंबई - माटुंगा रेल्वेस्थानाकावर एका युवतीचा विनयभंग केल्याचा प्रकार समोर आला आहे. एका नराधमाने संबंधित युवतीच्या गालावर चुंबन घेतल्याचे धक्कादायक फुटेज सीसीटीव्हीत कैद झाले आहे. रेल्वे पोलिसांनी या व्यक्तीला बेड्या ठोकल्या आहेत.

संबंधित घटना 25 जानेवारीला घडली आहे. माटुंगा रेल्वेस्थानकावर एक तरुणी पायऱ्या उतरत असताना पाठलाग करत आलेल्या एका युवकाने तिचे जबरदस्तीने चुंबन घेतले. तरुणीने या प्रकाराला विरोध करताच हा आरोपी जागेवरून तत्काळ पळून गेला. हा सगळा प्रकार माटुंगा रेल्वे स्थानकावरील सीसीटीव्हीत कैद झाला आहे. या प्रकरणाचा तपास पोलिसांनी सुरू केला होता. मात्र, संबंधित प्रकरणाबाबत पोलिसांकडे कोणतीही तक्रार दाखल झालेली नव्हती.

जीआरपी पोलिसांनी रेल्वे हद्दीत लोकल ट्रेन मध्ये पाकिटमारी करणाऱ्या आरोपींच्या विरोधात मोहीम सुरू केली होती. यामध्ये पोलिसांनी पाकीटमारीच्या गुन्ह्यात राजीजूर हबीब्यूर खान या आरोपीला अटक केली होती. आता याच आरोपीने पीडित युवतीचा विनयभंग केल्याचे स्पष्ट झाले आहे.

पोलिसांनी तुर्तास या आरोपीला चोरीच्या गुन्ह्यात अटक केली आहे, मात्र, विनयभंगाचा गुन्हा अद्याप दाखल केलेला नाही. पीडित युवतीने स्वतःहून या संदर्भात पुढे येऊन तक्रार दाखल करावी, असे आवाहन पोलिसांकडून करण्यात येत आहे.