भाजपमध्ये अंतर्गत धुसफूस; विखे पाटलांवर 15 दिवसांत कारवाई?

विरोधी पक्षनेते देवेंद्र फडणवीस आणि पक्षाचे संघटन मंत्री विजय पुराणिक यांच्यासमोर भाजपचे पराभूत नेते राम शिंदे, शिवाजी कर्डीले आणि बाळासाहेब मुरकूटे यांनी राधाकृष्ण विखे पाटील यांच्या विरोधात उघडनाराजी व्यक्त केली.

मुंबई- अहमदनगर जिल्ह्यातील भाजपमधील वातावरण ढवळून निघाले आहे. येत्या पंधरा दिवसात राधाकृष्ण विखे पाटील यांच्या विरोधात पक्षश्रेष्टी कारवाई करतील, असे सुतोवाच नाराज भाजप नेत्यांनी केले आहे. विरोधी पक्षनेते देवेंद्र फडणवीस आणि पक्षाचे संघटन मंत्री विजय पुराणिक यांच्यासमोर भाजपचे पराभूत नेते राम शिंदे, शिवाजी कर्डीले आणि बाळासाहेब मुरकूटे यांनी राधाकृष्ण विखे पाटील यांच्या विरोधात उघड नाराजी व्यक्त केली.

यावेळी त्यांनी पक्षातील काही मतभेद या नेत्यांच्या कानावर घातले. स्थानिक पातळीवरील काही मुद्यांवर विखे पाटील यांच्या समोरच चर्चा केली. आम्ही आमची बाजू मांडली. त्याचा लवकरच अहवाल केला जाईल. त्यांनतर पक्ष आपली भूमिका घेईल, असे शिंदे यांनी सांगितले. तर फडणवीस यांनी अतिशय गांभीर्याने आमचे म्हणणे ऐकले असून लवकरच ते कारवाई करतील, असा विश्वास बाळासाहेब मुरकूटे यांनी व्यक्त केला.

महायुतीचे संख्याबळ असूनही सत्ता स्थापनेत अपयशी ठरल्यानंतर भाजपमधील वाद अंतर्गत वाद उफाळून आला असून आता राज्यातील ही अंतर्गत धुसफूस दिल्ली दरबारीही गेली आहे. यानंतर आता झाडाझडतीला सुरुवात झाली आहे.

एकीकडे भाजपमधील जेष्ठ नेते एकनाथ खडसे यांनी पक्षातील अंतर्गत धुसफूस राष्ट्रीय कार्याध्यक्ष जे. पी. नड्डा यांच्या कानावर घातली आहे. तर राम शिंदे यांच्या नेतृत्वात अहमदनगर जिल्ह्यातील पराभूत उमेदवारांनीही राधाकृष्ण विखे पाटील यांच्या विरोधात पक्षश्रेष्ठींकडे तक्रार केली आहे. यामुळे भाजपमध्ये आलबेल नसल्याचे चित्र समोर आले आहे.
दरम्यान, शनिवारी अहमदनगर येथे विखे पाटील यांच्यासोबत स्थानिक नेत्यांची बैठक होणार असून यावेळी आगामी जिल्हा परिषद निवडणुकीची भूमिका ठरवली जाणार असल्याचे शिवाजी कर्डीले यांनी सांगितले.