मुंबई - महाविकास आघाडीच्या गलथान कारभारामुळे वीजग्राहकांना भरमसाठ वीजबिले आली आहेत. त्यामुळे येत्या तीन दिवसांमध्ये सरकारने वीजबिलात सवलत देण्याचा निर्णय न घेतल्यास, मंत्रालयात घुसून आंदोलन करू, असा इशारा भाजपचे आमदार अतुल भातखळकर यांनी दिला आहे. भाजपकडून आज महावितरणच्या प्रकाशगड कार्यालयावर मोर्चा काढण्यात आला होता, यावेळी ते बोलत होते.
सरकारच्या चुकीमुळे ग्राहकांना प्रचंड वीजबिल आले आहे. कोरोनामुळे आधीच नागरिक अडचणीत आहेत, हातात पैसा नसताना बील भरण्यासाठी पैसे कुठून आणायचे असा प्रश्न नागरिकांना पडला आहे. त्यामुळे बिलात सवलत मिळावी, यासाठी आज भाजपच्या वतीने हा मोर्चा काढण्यात आल्याची माहिती त्यांनी दिली.