मुंबई महापालिका निवडणुकीसाठी भाजपने कसली कंबर.. 'समर्थ बूथ अभियाना'साठी फडणवीसांची बैठक

शिवसेनेला कोंडीत पकडायचे असेल तर मुंबई महानगरपालिकेच्या निवडणुकीमध्ये शिवसेनेला धक्का देणे गरजेचे आहे. हे भारतीय जनता पक्षाच्या नेत्यांना चांगलेच ठाऊक आहे. त्यामुळे येणारी महानगरपालिका निवडणुकीच्या तयारीला भाजप लागलेली आहे. याबाबत विधानसभा विरोधीपक्ष नेते देवेंद्र फडणवीस यांनी आज एक महत्वाची बैठक आपल्या शासकीय निवासस्थानी बोलावली होती.

मुंबई - शिवसेनेला कोंडीत पकडायचे असेल तर मुंबई महानगरपालिकेच्या निवडणुकीमध्ये शिवसेनेला धक्का देणे गरजेचे आहे. हे भारतीय जनता पक्षाच्या नेत्यांना चांगलेच ठाऊक आहे. त्यामुळे येणारी महानगरपालिका निवडणुकीच्या तयारीला भाजप लागलेली आहे. याबाबत विधानसभा विरोधीपक्ष नेते देवेंद्र फडणवीस यांनी आज एक महत्वाची बैठक आपल्या शासकीय निवासस्थानी बोलावली होती. या बैठकीला विधान परिषद विरोधीपक्ष नेते प्रवीण दरेकर, भाजप मुंबई प्रदेशाध्यक्ष मंगलप्रभात लोढा, खासदार मनोज कोटक, आमदार प्रसाद लाड यांच्यासहित इतरही नेते उपस्थित होते. भारतीय जनता पक्षाच्या दिल्लीतील नेत्यांनी सुरू केलेले "समर्थ बूथ मोहीम" याबाबतही या बैठकीत चर्चा झाली असल्याचे प्रवीण दरेकर यांनी सांगितले.

मनपा निवडणुकीबाबत रणनीती -

मुंबई महानगरपालिकेच्या सत्तेत असलेल्या शिवसेनेला धक्का द्यायचा असेल तर महानगरपालिकेच्या निवडणुकीमध्ये शिवसेनेला महानगरपालिकेच्या सत्तेतून खाली खेचावे लागेल हे भारतीय जनता पक्षाला चांगलंच ठाऊक आहे. शिवसेनेमुळे राज्यात हातातोंडाशी आलेली भारतीय जनता पक्षाची सत्ता गेल्याने भाजप याचा वचपा काढण्यासाठी महानगरपालिका निवडणुकीची वाट पाहत आहे. या निवडणुकीसाठी भारतीय जनता पक्षाकडून पूर्ण रणनीती तयार करण्यात येत आहे. याबाबत 'समर्थ बुथ मोहीम' अंतर्गत मुंबईच्या प्रत्येक वार्डवर लक्ष ठेवण्याचे काम करण्यात येणार आहे. स्थानिक पातळीवरचे प्रश्न, त्या वार्डमध्ये असलेल्या लोकांच्या समस्या तसेच महानगरपालिकेमधील गलथान कामासाठी शिवसेनेची असलेली जबाबदारी या मुद्द्यांवर येणाऱ्या काळात भाजप अधिक आक्रमक होताना दिसणार आहे. याबाबतची चर्चा या बैठकीत करण्यात आली असून महानगरपालिकेसाठी भाजपकडून विशेष रणनीती आखली जाणार असल्याचे सूत्रांकडून माहिती मिळत आहे.