औरंगाबाद - ग्रामीण पोलीस दलातील विरगाव पोलीस ठाण्यात कार्यरत असलेल्या पोलीस कर्मचाऱ्याचा व्हिडिओ चांगलाच व्हायरल होत आहे. व्हिडिओचे कारणही तसेच आहे. हा पोलीस कर्मचारी चारचाकी चालवत असताना दारू पिण्याबरोबरच नाचतही आहे. असे करत असताना त्याच्या बाजूच्या सीटवर एक महिला देखील आहे.
संतोष सोनवणे असे या पोलीस कर्मचाऱ्याचे नाव आहे. व्हायरल झालेल्या व्हिडिओमध्ये संतोष हा चारचाकी चालवत आहे. गाडीत अमिताभ बच्चन यांच्या शराबी चित्रपटाचे गाणे मोठ्या आवाजात सुरू आहे. एका हाताने चारचाकी चालवणे तर, दुसऱ्या हातात दारूची बाटली आहे. गाण्याचा आवाज वाढताच संतोष झिंगाट होऊन नाचत आहे. त्याच्याच बाजूला बसलेल्या महिला हा सर्वप्रकार कॅमेऱ्यात कैद करत आहे.
नागरिकांना 'डू नॉट ड्रिंक अॅन्ड ड्राईव्ह'चे धडे देणाऱ्या पोलिसांकडूनच असा प्रकार घडल्यामुळे पोलिसांची नाचक्की झाली आहे. कायदा हा फक्त सर्वसामान्य नागरिकांसाठीच आहेच का? पोलिसांनी कायदा मोडल्यावर आता त्यांच्यावर काय कारवाई करणार असा प्रश्न नागरिक उपस्थित करत आहेत. आता वरीष्ठ अधिकारी मद्यधुंद पोलीस कर्मचाऱ्यांवर काय कारवाई करणार, असे प्रश्न उपस्थित होत आहेत.